Sha Secretariat yn leit tur paidbah ki nongtrei Muster roll ha ka 17 tarik ba mynthi ka Sorkar

Syllad | The Rising MeghalayaDecember 4, 2024

Ka All Jaintia Muster Roll Workers and Labour Union (AJMRWLU) kan pynlong da ka jingleit tur paidbah shapoh Secretariat ha ka 17 tarik Nohprah namar ka jingpulom jong ka sorkar Jylla ban kyntiew ia ka bai bylla jong ki nongtrei Muster roll ha ka Jylla.

Katkum ka jingong jong ka Seng ia ka Variable Dearness Allowance (VDA) la dei ban kyntiew naduh ka 1 tarik u Risaw 2024, bad ka Floor Basic Rate (FBR) kaba ju pynkiew shisien man la ka san snem ruh ka la dei ban treikam naduh ka 1 tarik u Risaw 2023 katkum ka Minimum Wage Act.

Haba kren ha ka jingialang bad ki lad pathai khubor ha ka 3 tarik Nohprah, u nongaiktien ka AJMRWLU u Bah KL Pariat u la ong ba kane ka jingdawa ka jong ki ka long namar ka jingkiew dor jong ki marbam mardih ba kongsan kaba la ktah jur ia ka ioh ka kot jong ki nongtrei bylla.

U Bah Pariat u la ong ba ha kine ki lai snem ba la dep ka Sorkar kam shym la pynkiew ia ka jingsiew kaba dei ban long ha man la ka san snem.

“Ka jingpynkiew kaba khatduh eh ia ka jingsiew ka dei ha u snem 2018 bad kaba la dei ban pynkiew biang ha u snem 2023, hynrei haduh mynta ka sorkar Jylla kam pat pynkiew satia ia ka tulop bad ia ka Variable Dearness Allowance kaba dei ban pynkiew ar sien ha ka shi snem” ong u Bah Pariat.

U la pynkynmaw ruh ba dei ha ka por ba ka Seng ka la pynlong ia ka jingiakhih ha u 2018 ba ka sorkar Jylla ka la kyntiew ia ka bai nong jong ki. “Wat mynta ruh ki hap ban pynlong da ka jingiakhih khnang ba kin ioh ia ki hok ki jong ki,” u la bynrap.

Nalor kata u la ong ruh ba ki nongialam ka Seng ki la iakynduh ruh ia u Myntri ba dei peit ia ka Tnad Labour kumjuh ia u Commissioner bad Secretary ka Tnad Labour ban pynsngew ia kane ka jingdawa ka jong ki, hynrei haduh mynta kim pat shym la ioh satia ia kano kano ka jubab kaba biang ha kaba iadei bad kane ka jingdawa.