Sha u CM pynsngew ka MFA halor ka jingdonkam ban siang thymmai ia u phlang plastik ha madan Third Ground, Polo

Syllad | The Rising MeghalayaDecember 7, 2023

Ki dkhot ka Meghalaya Football Association (MFA) hapoh ka jingialam ka jong u Bah Hamletson Dohling President, u Bah Sunesh M. Syiem Secretary bad katto katne ki dkhot haka 5 arik Nohprah ki la leit ban pynsngew hakhmat u Myntri Rangbah ka jylla u Conrad K Sangma halor ka jingdonkam ka synjuk ban bhah pisa kyrpang ban siang thymmai ia u phlang plastik ne artificial turf ia baroh ka madan Third Ground, Polo.                      

Haba kren sha ki lad pathai khubor haka 6 tarik Nohprah, u Bah Hamletson u iathuh ba hadien ba ma u bad ka kynhun ka MFA ka la dep ba kan shimti ia ka kam, ka la dep ban shong ia kiba bun ki jingialang, ha kaba ka daw kaba shah nyngkong eh la lap ba ka dei ka madan Third Ground.

U Bah Dohling u la pynkynmaw ba ia kane ka madan la ioh ban siang nyngkong ia u artificial turf ia kaba la ai sngewbha lyngba ka Fifa naduh u snem 2009, ha kaba ka jinglah ban pyndonkam ia kane ka madan hadien ba la dep ban siang ia une u phlang plastic ka long tang kumba 7-8 snem.

Pynban kumba ka long mynta kane ka madan hi kam long shuh, bad ha ka jingiakynduh ia u CM, u Bah Hamleston u la pynpaw ia ka jingkmen ba u la pdiang sngewbha ia ki bad la iakren ruh ia ka mat ba da kumno ban lah ban pynbha biang sa shisien ia kane ka madan, namar dei tang kane ka madan kaba lah ban sei ia kiba bun ki rang ialehkai ba kynsai ha ka jylla.

Nalor ka jingsiang thymmai ia u artificial turf, u bah Hamletson u la iathuh ruh ba ki la kyrpad ia u CM ba lada long kaba lah ka sorkar kan bhah kyrpang ruh ka pisa ban shna ia ki jaka ban ioh shong peitkai ki paidbah.

Katba na ka liang u bah Sunesh M Syiem, u iathuh ba hadien ba la ioh ban siang thymmai biang ia kane ka madan, kum ka synjuk kan khmih bniah ba ki klob ne ki riew shimet kiba kwah ban pyndonkam ia ka madan kin hap ban long kiba thikna ban siew ia ka bai pyndonkam ia ka madan.

Haba kylli hato don ne em ki klob ne ki team kiba la pyndonkam ia kane ka madan ha ki snem ba la dep bad khlem da siew pyndep pat ia ka bai wai, u bah Sunesh u pynpaw ba ha ka MFA ka don ruh ia ka kynhun treikam kaba dei khmih ia ki madan ne ka ground committee, ha kaba la pyrshang  ban wad ba haduh katno tylli ki klob kiba juh pyndonkam ia kane ka madan bad lada don pat kiba pyndonkam bad khlem siew ia ka bai wai, ka MFA kan hap ba kan thoh biang sha ki katno tam lei lei lada jia ba ka pisa lei lei ka dei kaba la bun, ki klob hi ki donkam ban pynkhuid.