Sha u DC ujor ka KSU-EJH halor ka jingshim kabu ki dukan die mar khamtam ki mar bam

Syllad | The Rising MeghalayaDecember 2, 2023

Hadien ka jingioh pdiang ia shibun ki jingujor na ki paidbah ka thaiñ, ka seng KSU East Jaintia Hills District Unit (KSU-EJH) ha ka 1 tarik u Nohprah 2023 ka la pynsngew bad leit buh ruh da jingthoh sha u Deputy commissioner ka district ha kaba iadei bad ka jingshim kabu palat ki dukan die mar khamtam halor ka marbam mardih.

Ka KSU ka la pynsngew ba ki la don katto katne tylli ki dukan kiba shim kabu ban die ia ki mar khamtam ki marbam kaba long da shisien ka jingleh kam beaiñ. Ka seng ka la pynsngew bad dawa ruh ba ka bor district ki dei ban jurip ia ki dukan khnang kum kine ki jingleh beain jong ki nongde khamtam ha kaba iadei bad ki marbam kan ym ktah ia ki paidbah ka thain.

Nalor kata ka KSU lyngba une u kyrwoh ka la pynsgew ruh ba ki mawser lane ki maw ban thew ki jingdie dei ban ioh ia ka registration seal na ka tnat ba dei peit bad ruh ki dukan ki dei beit ban don ia ka cash memo kiba don ia ka trading licence number, ka kyrteng dukan bad kumta ter ter khnang ban lah ban tehlakam ia ki kam die beaiñ da kine ki dukan bad khamtam ruh ban buh ia ki jingwah ne display board ki ba thoh ia ki dor trai jong ki mar ki mata khamtam ki mar bam mar dih.

Ha kaba iadei bad kane ka KSU ka dawa ruh ban buh ia ka District Consumer Dispute Redressal Commission katkum ka Consumer Protection Act 2019 bad ruh ban ai ki kynja Consumer Awareness Program hateng hateng sha ki paidbah nongsiew nongtda khnang ba kin ioh jingshai.

Halor kane ka bynta na ka liang u Deputy Commissioner u kular hakhmat ka seng ban pynshitom da kaba tyngeh pyrshah ia kito ki dukan kiba die palat katkum ba la buh ha ka MRP, bad u la kular ruh ban bthah ia baroh ki dukan rashon kiba hap hapoh u pud u sam jong ka EJH ki hap ban buh ia ka display board.