Sha u DC ujor ka Seng JNC ba pynslem ka MRB ia ka shim PM-KISAN na ka bynta ki nongrep

Syllad | The Rising MeghalayaSeptember 7, 2023

Ka Jaiñtia National Council (JNC) Sumer Circle ha ka 6 tarik mynta u bnai ka la leit ban ujor sha u Deputy Commissioner ka EJHD, u Abhilash Baranwal, IAS halor ka jingpynslem jong ka Meghalaya Rural Bank, Sutnga Branch ban pyllait ia ka pisa lyngba ka skhim PM-KISAN sha ki paid nongrep.

Ha kane ka jingleit iakynduh ka JNC hapoh ka jingialam u president u Bah Sakilan Chyrmang ka la ong ba ka sngewkhia jur ban tip ba hapoh ka district jong ki da ki hajar ki nongrep ki la bteng ban shah kyntait ban ioh jingmyntoi lyngba ka skhim PM-Kisan Samman Nidhi.

Ka JNC ka la ong ruh ba ha kane ka thain (Sumer Elaka) ki nongrep ki iakynduh ia shibun ki jingeh ha kaba iadei bad ka rep ka riang bad ka kam ri jingri, hynrei mynta kila iakynduh jingeh ruh ban ioh pdiang ia katei ka skhim jingiarap kaba dei ka hok ka jong ki.

Lyngba une u kyrwoh ka JNC ka la ong ba katba kiwei ki nongrep hapoh ka ri kila ioh pdiang ia ka pisa kaba dei hok, hynrei ki nongrep ka thain ki la shah pynduh noh ia kane ka hok ka jong ki.Halor kane ka mat ka seng ka la ong ba ki nongrep kila rah bun bunsien kila leit ban iakren halor kane ka jingeh bad katei ka bank MRB Sutnga branch hynrei kim shym la ioh jubab ei ei ruh na u  branch manager lane na ki staff.

Ka JNC ka la ong ba kane ka dei ka jingpulom kaba sngewkhia bad kaba kjat jur ia ka bha ka miat jong ki paid nongrep ka thain.

Ha kajuh ka por ka JNC ka pynpaw ruh ka jingsngew bynniaw ba ki nongrep ha kiba bun ki khep ki la ngat ha ka jingshah banbein namar ka jingleh bym suitniew da ki nongtrei jong ki bank.

Ha ka jingshisha ka JNC ka la ong ba ia ka pisa lyngba kane ka skhim ba la pyntreikam da ka sorkar India la phah beit sha ki bank account jong ki nongioh jingmyntoi bad ka sorkar jylla ka donkam tang ban ithuh ia ki longiing jong ki nongrep kiba dei ban ioh ia kane ka skhim.Kumta ym lah shuh ban sngewthuh balei ba katei ka bank ka bteng ban iai pynslem ban pynioh ia kane ka skhim.

Shuh shuh ha katei ka jingiakynduh, na ka liang u DC u la pynpaw ba kane ka dei ka mat kaba khia shibun bad kaba dei ban shim mardor ia ki sienjam, bad u la pynthikna ruh ba un rah ia kane ka mat bad ki heh sorkar ba dei khmih abd ruh ban pynlong ia ka jingtohkit khnang ban lah ban weng noh ia kine ki jingeh bad khnang ba ki hok jong ki paid nongrep kin ym shah ktah.