Sha u DC ujor ka SKRS halor ki rukom aijingshakri hapoh Civil Hospital Nongpoh 

Syllad | The Rising MeghalayaSeptember 25, 2024

Ka Synjuk ki Rangbah Shnong Ri Bhoi District (SKRS) namar ka jingsngewkhia halor ki mat kiba ktah ia ki paidbah, ha ka 24 tarik Nailur, ki la leit ban rah ia ki ar tylli ki mat jingujor hakhmat u Deputy Commissioner ka District u Abhilash Baranwal ban kyntu ba un shimkhia lem mardor ban pynbeit na ka bynta ka bha ka miat  jong ki nongshong shnong jong ka district.

Ha kane ka jingleit iakynduh ia u DC, na ka liang ka Synjuk ki Rangbah Shnong la lamkhmat da u Bah BB Makdoh, President, Bah PB Sylliang, Secretary nalor kiwei kiwei.

Na ka liang u Bah PB Sylliang Secretary ka Synjuk haba kren sha ki lad pathai khubor u la ong ba ka Synjuk hi ka la leit ban rah ia ka mat kaba la ktah mationg bad buh jingshong syier shibun ia ki nongshong shnong ha kaba ia dei bad ki lad ai jingsumar hapoh ka Civil Hospital Nongpoh.

U la ong ruh ba kane ka la wan long ruh hadien ka jingjia ba dang shen ha kaba kawei ka longkmie ka la duh ei ia i khun ba dang shu kha jong ka iba la hap noh katba ka dang leit shabar (painkhana) jong ka hospital, bad ruh halor ka jingjia ba dang shen ia kawei ka samla kaba la phlei snam ha kaba ym shym la don ba patiaw wat hadien ba la khot la bunsien ia ki nongsumar hapoh ka hospital.

Kumta halor kane ka bynta, na ka liang ka Synjuk ka la buh ka jingkyrpad ia u DC ba un shimkhia ban pynbeit lem ia kine ki jingjia kiba la jia ha katei ka jaka sumar paidbah khnang ba kum kine ki jingjia ba sngewsih kin ym jia shuh khamtam ban iada ia ki paidbah ban lait na ka jingshong syier haba leit shah sumar ha ki jaka sumar paidbah.

Nalor kata u Bah Sylliang u la pyntip ruh ba sa kawei pat ka mat ba la rah hakhmat u DC ka long halor ka jingpynslem ki bor ka DSC ban pyllait noh ia ka resol ha kaba ia dei bad ki post bapher bapher ba la dep thoh ia ki eksam mynta la bun bun snem khnang ba kito ki samla kiba dei hok ban ioh ia ka kam kin ioh noh shwa ban dier.