Sha u Lat bad ka ïingbishar yn ujor ki Liang Pyrshah ba thung Chairman beaiñ ha JHADC
JOWAI: Ki dkhot ka Liang Pyrshah ha Jaiñtia Hills Autonomous District Council (JHADC) kaba kynthup ïa u Ma Awhai Andrew Shullai, u nongialam ka liang pyrshah, u Arbor Hima Darnei, Holando Lamin bad u Aiborlang Shadap kila rai ban ujor sha u Lat ka Jylla bad ka ïing bishar halor ka jingkynnoh ba u Deputy Chairman jong ka JHADC u Ma Ailad Bhoi ula ïaid lait ïaki kyndon treikam ka konsil bad ka rukom pyniaid kam ka dorbar uba la rai pynlong iaka jingjied Chairman khlem da pyntip sha u Lat halor ka jingthylli ka shuki Chairman ha JHADC.
U Andrew ula ong u Lat ka Jylla ula khot ïa kane ka Dorbar ban weng ia u ma Lakhon Biam na ka shuki Chairman hadien ba ula ïoh ka shithi ujor na ki 22 ngut ki MDCs ka konsil ba kila duh jingshaniah ïa u Chairman ka konsil Ma Lakhon Biam uba la pyndonkam bakla iaka bor.
![](https://www.syllad.com/wp-content/uploads/2024/09/JIT-Vacancy-823x1024.avif)
U ma Lakhon u dei u MDC uba la rung bad pyniasoh sha ka Bharatiya Janata Party (BJP) bad ki lai ngut kiwei pat ki MDC.
U Lat ka Jylla katkum ka sub-rule (5) jong ka Rule 36 jong ka Assam & Meghalaya Autonomous District Councils (Constitution of District Councils) Rules, 1951 ula khot iaka dorbar haka 9 tarik une bnai ban wanrah ïaka resolution ban wengkam Chairman ia u ma Lakhon Biam katkum ka Rule 107 jong ka District Council Rules.
U Lat ula aibor ia u Deputy Chairman ban pynïaid ïa kane ka Dorbar jong ka Konsil khnang ba ki dkhot ka Liang Synshar kin ioh ban wanrah iaka resolution ban weng Chairman.
U Deputy Chairman ka Konsil u Ma Ailad Bhoi ula pynbna ba ula ioh pdiang iaka shithi iehnoh kam u Chairman haka step sngi Nyngkong.
Namar ba ka shuki Chairman kala thylli u Deputy Chairman ula pynbna ban jied ia u Chairman ba thymmai ka konsil haka juh ka sngi. Haka por step haka dorbar ym don mano mano na kaliang pyrshah kiba wan haka dorbar kynthup iaki saw ngut ki MDC BJP.
Ha ka jingjied Chairman ba thymmai kaba long haka por nohphaisngi kaba pyniaid da u Deputy Chairman ula pynbna ba u ma Finelynes Bareh ula jop suk khlem don mano mano ba pyrshah.
Shuwa ban pynlong iaka elekshon jied Chairman ki dkhot ka Liang Pyrshah ruh ki iadonlang haka dorbar, hynrei kila ieng ban pyrshah ïaka jied Chairman thymmai hapoh ka dorbar bad kynnoh ba ka iaid lait iaka kyndon jong ka Autonomous District Council Rules namar ba khlem pyntip sha u Lat hadien ka jingiehnoh kam u Chairman.
U Ma Awhai Andrew Shullai u nongialam ka Liang Pyrshah ula ong ba katkum ka rule 32 jong ka sub-rule (1) ka kyndon pynïaid kam jong ka District Councils ka ong lada ka shuki Chairman ka thylli ka donkam ka jingjied ïa u Chairman ba thymmai bad u Lat ka Jylla un buh ïaka tarik ban jied Chairman bad u Deputy Commissioner lane u Secretary jong ka District Council kin pyntip sha baroh ki dkhot jong ka konsil.
U Ma Winning Garland Sungoh, u Phasmon Dkhar, u Richard Sing Lyngdoh kiba don na ka liang kila ong ba u Deputy Chairman uba pynïaid ïaka dorbar u lah ban pynlong ia kane ka jingjied Chairman thymmai katkum ka kyndon rule 123 ka ong ba u Chairman u don ka bor ban pynïaid ïaki kam ka ïing dorbar ha baroh ki jait kam, kumjuh ruh ki bym shym la buh ha kane ka kyndon pynïaid kam.
Ki dkhot ka liang synshar kila ong u Chairman udei ban pyniaid beit ïaka elekshon jied Lamphang thymmai.
U Ma Andrew ula ieng biang ban pyrshah bad ula ong “Lada u Deputy Chairman un iaid shakhmat ban pynlong ia kane ka elekshon jied Chairman ka pynkhein ïaka kyndon aiñ jong ka konsil bad kalong kaba beaiñ bad wanrah iaki nuksa kiba sniew kum u nongmihkhmat. U Deputy Chairman u dei ban pyndam ia kane ka elekhson jied Chairman.”
Namar ba u Deputy Chairman ula iaid shakhmat ban pynlong iaka jingjied Chairman ki MDC ka Liang Pyrshah kila mih jyndat napoh ka ïing dorbar.
Ka Liang Pyrshah kala byrthen ban ujor sha u Lat Jylla bad ka ïing bishar ban ujor halor ka jingpyndonkam bakla u Deputy Chairman iaka bor.
U Ma Andrew ula ong ba lada ka pdiang ka ïingbishar iaka jingujor jong ngi wat ban pynduh jinglong nongmhkhmat ruh ka don ka kyndon haka ADC rules.
U ma Thombor haba ïakren ula ong ba ki ieng halor ka nongrim ba ka rule 123 ka ai bor ia u Chairman ban pyniaid iaki kam ka dorbar kumjuh ki bym buh haka rule bad kane ka jingjied ia u Chairman kalong kum ka rukom hi namar ba la thylli ka shuki Chairman.
Leave a Reply