Sha u PM thoh ka AMSSASTA ban tuklar pynkiew tulop ia ki nonghikai SSA ha ka Jylla

Syllad | The Rising MeghalayaOctober 8, 2024

Ka All Meghalaya SSA School Teachers Association (AMSSASTA) ha ka 7 tarik u Risaw ka la kyrpad ia ka jingtuklar lem jong u Myntri Rangbahduh ka Ri u Narendra Modi na ka bynta ka jingpynkiew tulop ia kumba 13,000 ngut ki nonghikai skul SSA.

“Ngi kyntu ia phi ba phin sngewbha ban shimkhia lem mardor ha kaba iadei bad ka jingpynkiew tulop ia ki nonghikai skul SSA,” ong ka seng ha ka shithi sha u PM Modi.”

“Da kaba phaikhmat halor ki jinglut jingsep bad ka jingkiew dor jong ki mar ki mata hapdeng kum kane ka jingeh kaba ki nonghikai SSA ka Jylla ki iakynduh, ngi kyrpad ia ka jingtuklar lem ka jong phi ban iakren ia ki bor ba dei khmih jong ka Tnad pule puthi ha Meghalaya khnang ba kin lah ban pynurlong noh mardor ia kane ka jingdawa ka jong ngi shwa ba ka jinglong jingman ia ki nonghikai SSA kan nangkham sniew hapoh Meghalaya,” bynrap ka shithi.

Katkum ka jingpynpaw jong ka Seng, ka jingpynkiew tulop kaba khatduh eh ka la jia naduh u snem 2016-17, kata ka jingkiew tulop kaba long na ka T.9,200 sha ka 19,044 ia ki nonghikai LP bad na ka T.9000 haduh T.20493 ia ki nonghikai UP.

Ka AMSSASTA ka la pynlong da ka jingiakhih shong kyllain mungor kaba khlem buh por kaba la kynjoh sha ka sngi kaba hynniew ban dawa ia ka jingpynkiew tulop kaba 100% na ka sorkar.

“Haduh mynta ka sorkar kam pat shym la pynkiew ia ka tulop jong ngi bad kaba la wanrah ka jingeh kaba khraw ha ka liang ka ioh ka kot kumjuh ka jingeh kaba iadei bad ki khynnah skul ha ki tnad bad ki kyrdan pule bapher bapher.”

Nalor kata ka seng ka la ong ruh,”Namar ka jingmynthi jong ka Sorkar Jylla ban pynurlong ia ka jingdawa, ngi ki nonghikai SSA na baroh ki kynhun jaidbynriew bad niam ngim banse ban bteng ia kane ka jingiakhih shong kyllain mungor ha kane ka nongbah Shillong naduh ka 1 tarik u Risaw haduh ka shuti puja ban pynpaw ka jingpyrshah ia ka jingpulom jong ka Sorkar Jylla.