Sha u SDO Amlarem ujor ka synjuk waheh shnong ba jur ka jingdheng kali ha surok DAJ

Syllad | The Rising MeghalayaFebruary 17, 2021

Ka Synjuk ki Waheh Shnong War Jaintia haka sngi Balang kila ujor sha u Sub-Divisional Officer (Civil) Amlarem Sub Division halor ka jingjur ka jingdheng kali ha ka surok Dawki Amlarem Jowai naka jingiaid sahuh ki trok kit mawshun kiba shalan sha Bangaldesh.

Ka Synjuk Waheh Shnong War Jaintia kala ong ba kane ka jingjur ka jingdheng kali kala ktah khlieh la ka sngi naduh par mawshun kaba don ha Amtuma haduh Nongtalang Amsohmeheleng. Kane ka jia namar ba ki trok kit mawshun kila ieng da u line ha ka surok.

Ka Synjuk haka dorkhat kaba la phah da u president bad secretary kiba kynthup ia u Daniel Khongsit bad u Siangmi G Lacuna sha u SDO Civil Amlarem bad kila dawa ban pyndam mardor iaka jingieng line ki trok kit mawshun ha surok bah namar kala wanrah ka jingkhapniah kali bad jingdheng kali kaba jur kaba ktah iaka iaid ka ieng ki kali motor.

Kane ka jingdheng kali kala ktah iaki paidbah nongleit nongwan khamtam ki nongpang, longkmie ba pun ba kha khun, ki khynnah skul, ki nongshong iew ha kaba kim lah satia ban poi ha ka por kaba biang sha ka jaka kaba ki thmu.

Naka liang u SDO Civil Amlarem u la pynthikna ba un shim khia ia kane ka jingeh ki paidbah, la ong u Daniel Khongsit.