Sha u SP ujor ka KSU Narpuh ia ki pulit kiba bom lathai wat ia ki kynthei khynnah

Syllad | The Rising MeghalayaAugust 30, 2023

Ka Khasi Students’ Union (KSU) Narpuh Circle haka sngi Balang kala leit ban ujor da ka ejahar sha u Superintendent of Police ka East Jaintia Hills pyrshah ia u  Addl SP, u Dy SP bad ki pulit kiba donkti ha kaba bom lathi khlem jingmap wat ia ki kynthei khynnah ha ka jingjia kaba la jia ha ka 24 tarik mynta u bnai ha ka shnong Thangskai EJH.

Ka KSU kala leit ban buh ia kane ka jingujor hapoh ka jingialam jong u Ma KS Suchiang President, ki dkhot lem bad katto katne  ki nongialam napoh District unit ha kaba ki la dawa ba dei ban pynshitom ia baroh ki pulit kiba donkti ha kaba bom lathi naphang ia ki paidbah kata kynthup ia ki kynthei khynnah ha ka por ba pynlong ia ka public hearing jong ka Meghalaya Cement Ltd, ha Thangskai, East Jaintia Hills ha ka 24 tarik uneu bnai.

Lah ban pynkynmaw ba ha katei ka jingjia kaba la jia ha katei ka sngi na ka liang ki bor pulit ki la shoh bad kawang lathi khlem jingmap wat ia ki kynthei khynnah, kata hadien ka jingkynshoit bad pynshit da ki arngut ki nongtrei jong ka kompeni Topcem kumba la sakhi ruh lyngba ki video kiba la saphriang ha ki social media.

Ka KSU ka la ong ruh ba kam lah ban pdiang halor ka video kaba la saphriang ha kaba la iohi bad uwei u briew u la shah thombor ha ka kynhun ki pulit kiba don kumba 10 haduh 15 ngut hapoh ka jingialam jong u Addl SP ka EJHD. 

Na ka liang ka KSU lyngba une u kyrwoh ka la pynpaw ruh ba katkum ka hok longbriew manbriew ym lah satia ban pdiang ia kane ka jingleh riewkhlaw da ki briew jong ka ain.Ha kajuh ka por ka dawa ruh ba dei ban pynshitom ia baroh kito kiba donkti ha katei ka kam pyntriem bad ba ka ain kam dei ban noh shiliang.