Shad kmen ka KSU ba pheil ka jingthmu wanrah CAB ha Rajya Sabha

Syllad | The Rising MeghalayaFebruary 13, 2019

SHILLONG: Ka Khasi Students’ Union (KSU) haka sngi Balang kala mih paidbah sha surok sor Shillong ban shad kmen hadien bala pynwai noh ïaka dorbar (adjourned sine die) jong ka Rajya Sabha khlem wanrah ïaka Citizenship (Amendment) Bill, 2016 kaba la pynkhih win baroh kawei ka thaiñ Shatei Lammihngi.

Kane ka dei ka dorbar ba khatduh jong ka Rajya Sabha shuwa ban kut ka samoi jong ka Lok Sabha, kaba la poi biang ka elekshon MP.

Ka Dorbar Rajya Sabha kala wai da ka jinghuri hura bad ym shym la lah ban pynïaid beit ïaka dorbar namar ba jur ka jingpyrshah jong ki dkhot. Da ka jingpynwai ïa kane ka dorbar la pheil ka jingthmu ban wanrah ïaka Citizenship (Amendment) Bill.

Kane kala ai mynsiem ïa ki seng saiñ hima bapher bapher bad ki kynhun sengbhalang ha baroh kawei ka thaiñ Shatei Lammihngi kiba pyrshah iaka CAB; bad kila hiar ruh sha nongbah Delhi ban ïakynduh ïaki nongialam ki seng sain hima bapher ban kyrpad ban pyrshah CAB kaban ai bor ban kdup ïaki bar ri na Bangladesh, Pakistan and Afghanistan.

Hadien ka jingpulom noh ka jingthmu ban wanrah ïaka CAB ha Rajya Sabha, ka KSU kala mih sha surok bad rah ïaki lama ka ka KSU da ki thuk thuk bad kali ban shadkmen bym lah mynjur ne pynlong aiñ ïa kane ka CAB.

U Myntri Rangbah ka Jylla Conrad K Sangma bad ka North East Students’ Organisation (NESO) kaba ialam da u Chairman Samuel B Jyrwa kila hiar sha ka Delhi ha kine ki sngi bala dep ban leit kyrpad ïa ki heh sain hima sima bad ka kynhun Myntri Sorkar Pdeng ban kyrpad ban pyrshah ïaka CAB.