Shah bat bording u engineer ka Lakroh Mini Hydel Project

Syllad | The Rising MeghalayaAugust 19, 2024

Haka jingjia kaba sngewsih uwei u engineer uba dei khmih iaka jaka pynmih bording Lakroh Mini Hydel Project kaba don ha Pachum, Lakroh ula shah bat haka bording haka step 19 tarik Nailar.

Kane ka jingjia kala jia haka por kumba 7 baje eiei mynstep, haka por ba une u engineer u dang jurip iaka jaka pynmih bording (strong room).

Ka khubor ka iathuh ba une u engineer u dei u Eddy Kerry Pohtam.

U kni jong une u Engineer, u Bah Lop Pohtam ula ong mar mar la pynkit ia une u engineer, hynrei ka jingbym lait kali sha kane ka jaka pynmih bording kala shim por ban kit ia u Eddy namar ba hap ban kit da ki briew haduh ban poi ha surok ba pyniasoh iaka Lakroh bad Muktapur.

Ula iathuh ruh ba ula pan jingiarap na ki shipai BSF kiba la pynpoi iaka Ambulance ha Lakroh bad kit sha Pdengshakap ban ioh jingsumar, hynrei haba poi ha kane ka jaka sumar ruh, kaba sngewsih kalong ba ym don doctor ban ai wat iaka jingsumar kaba malu mala (first aid).

Kumta la pynkit ia u Eddy sha Bethany Hospital Shillong bad mynta u dang don haka jingshah sumar.

U Bah Lop Pohtam ula pynpaw iaka jingsngewsih halor kane kane ka jingjia bad la buh jingkylli kumno ka tnad MeECL/MePGCL ka treikam haba tang ka surok ban leit sha power house kane ka tnad kam lah ban shna. Ula ong baroh shikatta ki engineer bad ki nongtrei ka MeECL ki hap ban iaid da ka kjat hadpeng ka ktieh bad ka umsaw ha ka aiom slap kaba bym don satia ka jingshngain iaki nongtrei kane ka tnad.

Ula dawa na ka MeECL ban pynbeit mardor ia kane bad ban pynthikna ba kum kine ki jingjia kim dei ban jia hadien habud.

Kane ka jaka pynmih bording ka MPGCL ka dei kaba shongdor T.21.43 Klur. La bei pisa naka Ministry of New and renewable Energy, Government of India (MNRE) T.6.75 klur bad ka North Eastern Council (NEC) T.5 Klur kaba duna la hap ban buria da ka tnad T.9.68 klur. Ka ingpynmih bording na kane ka jaka kala sdang naduh u snem 2019 bad pynmih iaka bording kaba 1.5 Megawatt.