Shah bat haduh 1,788 tylli ki kali tah iit iong ha Shillong; Shah dain kuna T. 13.35 lak

Syllad | The Rising MeghalayaSeptember 6, 2024

Ki Pulit ka East Khasi Hills District kila ioh ban bat haduh 1,788 tylli ki kali tah iit iong bad dain kuna haduh T 13.35 lak ha ka jingtalasi ba la pynlong ha ka nongbah Shillong. 

U Superintendent of Police ka East Khasi Hills u Bah Sylvester Nongtnger haba pyntip ia kane haka 6 tarik Nailur u la ong, “Khnang ban pyntreikam ia ka hukum jong ka Iingbishar Supreme Court, ki pulit ka Shillong Traffic Police (STP) ki la pynlong ka jingtalasi pyrshah ia ki kali kiba tah iit iong ha kaba ki la ioh ban bat noh ia haduh 1,788 tylli bad dain kuna haduh T. 13,35,000, kata tang naduh ka 1 tarik Naitung haduh ka 6 tarik Nailur 2024.

“Ha kane ka jingtalasi ki bor pulit ki la tar noh ruh ia baroh ki black film ba la pyndait ha ki kali bad dain kuna ruh ia ki,” ong u SP. U la pyntip ruh ba na ki 1788 tylli ki kali ba la ioh bat, 30 tylli ki dei ki kali sorkar.

Ha ka jingpynpaw ka jong u la ong ba ka Supreme Court ka India ha ka jingpynmih hukum halor ka mukotduma ba la bishar ka la khang pyrshah halor ka jingtah iit iong la kalong katno katno ka percentage ba lah ban iohi shapoh ne Visual Light Transmission (VLT) ha ki iit kali, windscreen (shakhmat bad shadien) bad ki jingkhang.

“Halor kane ka STP ka kyntu jur ia baroh ki trai kali ba kin kiar na kaba tah iit iong ha ki safety glass, windscreens bad jingkhang jong ki kali bad lada ki la tah kin sngewbha ban weng noh ia ki,” ong u SP da kaba bynrap ba ka jingbat ia ki kali ba tah iit iong nalor ka jingpynkhein ia kiwei pat ki kyndon jong ka MC Act kan iai bteng bad yn shim da ki sienjam ba tyngeh pyrshah ia kiba pynkhein ain.