Shah beh kylla sa u Pulit ka Jylla ba sah pahara ha Psiar haka bor synshar District ka Karbi Anglong

Syllad | The Rising MeghalayaJune 21, 2019

JOWAI: Tang namar ba sah pahara ki Pulit jong West Jaiñtia Hills ha Psiar, ka shnong kaba hap ha khappud Meghalaya-Assam kala pynlong ïaki Pulit Assam ryngkat bad u Border Magistrate ka West Karbi Anglong, Assam ban hiar sha ka shnong Psiar kaba la pynher syrngiew ïaki kynthei khynnah ha skul bad ki paidbah.

Ki pulit jong ka sorkar Assam haka sngi Thohdieng ki la wan hiar sha ka shnong Psiar bad pynher krad iaki pulit jong ka Jylla Meghalaya kiba shong sah shipor ha iing Dorbar jong ka shnong Psiar.

Ha katei ka jinghiar ki pulit Assam, u Waheh Shnong ka Psiar u Bah M. Synnah ula pyntip mar mar sha ki bor District jong ka West Jaiñtia Hills District bad na ka liang ki bor District ka la phah ia u Border Magistrate jong ka West Jaiñtia Hills u Bah Ferdinand Basan bad u Bah Donkupar Moksha Dy. SP West Jaiñtia Hills ban iakren bad ki bor pyniaid District jong ka West Karbi Anglong.

Ka jingiakren hapdeng kitei ki ar liang mamla ka la long kaba thnam bha bad baroh ar liang ki la pyni ia la ka nia ka jutang.

Ki pulit Assam ki la hukum ia ki pulit ka Meghalaya ban mih noh mardor na katei ka jaka namar ki khlem ioh jingbit na ki bor District jong ka West Karbi Anglong District.

Ha kaba khatduh khatwai ki pulit ka Meghalaya ki la mynjur ban mih na katei ka jaka bad leit sah pat sha ka Shnong Sahsniang.

Ki bor pyniaid District na West Karbi Anglong (WKA) ha ka jingialam jong u Magistrate Robert Tulor, u DSP P. Gogoi bad 6 trok ki pulit kiba la kieng aktiar bha bad kiba la wanrah ruh ki tiar pynsat khmat kumjuh ki paidbah na ka jaidbynriew Karbi kila wan sha katei ka shnong.

Kane ka jia ba hadien ba u Pulit ka Assam ula hap ban pynpra ïaka ktem Pulit haka 13 tarik une u bnai ba pyrshah u paidbah bad synshar District West Jaiñtia, ki paidbah bad katto katne ki sengbhalang na Karbi kila pynpaw ka pyrshah kaba jur.

Kunta haka sngi Thohdieng hadien ba ka bor synshar District ka Karbi Anglong ruh hadien bala ïoh jingtip ba don ki Pulit ka Jylla ba sah ha ka shnong kila wan hiar ban beh kylla ïaki.

La kynnoh ba ki Pulit Assam ryngkat u dieng lathi, ki tiar ialeh kila kren kyrkait bad pynthud ïaka jingpynlong skul bad ki khynnah na ka jingtieng kila phet na ki skul jong ki.

Ka khubor ka ïathuh ba ka synshar District jong ka Karbi Anglong ryngkat bad pulit kila wan hiar sha katei ka shnong ba ki mut ba ka Jylla kala buh ktem Pulit ha katei ka shnong.