Shah byrngem pynbthei bom ka Meghalaya High Court, pynjur ia ka jingpahara

Syllad | The Rising MeghalayaJune 18, 2024

Ka Tnat pulit ka la pynjur ia ka jingpahara ha ka ïingkashari Meghalaya High Court hadien ba ka la don ka jingbyrngem pynbthei bom ia kaba la ioh pdiang lyngba ka email haka 18 tarik Jylliew.

Lah ban kdew ba kane ka jingshah byrnngem pynbthei bom ka dei ruh ka sien kaba ar pyrshah ia ki bor ba dei khmih ka Meghalaya High Court. Ka jingbyrngem kaba nyngkong ruh ka la wan long lyngba ka email kaba la jia ha ka 6 tarik Kyllalyngkot, kata kaba maham ba ka lah ban don ka jingjia bthei bom hapoh kane ka iingkashari.

 “Haba shimkhia mardor halor kane ka jingbyrngem pynbthei bom lyngba ka email, ngi la pynjur ia ka jingpahara ha baroh ki bynta jong ka ïingkashari Meghalaya High Court,” ong u heh pulit.

Nalor kata la pyntip ruh ba haka 18 tarik Jylliew ka la don ka jingtalasi ha ki bynta jong kane ka iingkashari ha ryngkat ka jingiadon lang ka kynhun Bomb Squad bad Bomb-Sniffing Dog ne ki ksew sma bomb hynrei ym shym la lap eiei, ong u heh pulit.

Ha kawei pat ka bynta, ka jingtohkit halor kane ka jingbyrthen lyngba ka email ka la iaid shakhmat da ki bor pulit.