Shah iehshrah ka surok PMGSY khlem maramot, wat ka DLP kam pat kut ha Amlarem Sub Division

Syllad | The Rising MeghalayaSeptember 1, 2024

Wat la ka Sorkar Kmie bad ka Sorkar Jylla kala shim iaki sienjam ban pynioh surok ha baroh ki shnong nongkyndong lyngba ka skhim PMGSY, phewse kaei kaba jia long ba ka surok Pradhan Mantri Gram Sadak Yojana (PMGSY) kaba pyniasoh iaka shnongThangbuli kaba hap hapoh ka Amlarem Sub Division, West Jaintia Hills District kala shah ieh noh khlem maramot wat la ka por ne ka jingkitkhlieh u kontrak ban shna iaka surok kam pat kut kaba la tip kum ka Defect Liability Period (DLP).

Kane ka surok PMGSY kaba pyntrei ha u snem 2020 ka pyniasoh iaka shnong Jarain, Thangbuli bad Umladkhur ka don iaka jingjngai kaba 4.39 KM haka jinglut 200.334 lak tyngka. La pyntrei iaka da kontrak u Ma Lingias Dkhar bad la bei pisa da ka Ministry of Rural Development jong ka Sorkar India bad la pyntrei da ka tnad PWD (Rds) Jowai South Division cum Programme Implementation Unit (PIU) PMGSY.

Ban maramot iaka surok ne ka DLP, u kontrak un hap ban kit khlieh, hynrei la iehnoh ia kane ka surok khlem maramot lait tang shuwa ka jingiaseng War Jaintia Presbytery ha u snem 2023, la ong u Waheh Shnong ka Thangbuli Ma Disuk Tariang.

Katkum ka Defect Liability Period u kontrak ba shna ia kane ka surok udei ban khmih iaka jingjot jingpei ka surok haduh 5 snem bad ka sorkar kala mang kyrpang T.21.385 lak. Kane ka jingmaramot katkum ki kyndon ka skim, ki kynthup ban pynkhuid iaki sanium hadien ka aiom slap, ka jingmaramot iaki jaka ba twa, ban pynbha iaki rud surok, ban pyndap iaki thliew ki syar bad ban siang rong ban jyllih, ban pynkhuid bad shna iaki nala man la ka ar snem. Lada donkam dei ruh ban pynbha iaki road side furniture ne kino jaka shong paidbah, kino kino kiba pynieng ha surok ban shai ban kdew (road sign) iaka jinglong jingman ka surok bad ban airong iaki kynroh.

U Waheh shnong Thangbuli u Ma Disuk Tariang ula iathuh shuh shuh ba halor ka jingsniew jong kane ka surok kila dep ban ujor da ka jingthoh sha u Executive Engineer jong ka tnad PWD South Jowai Division naduh u snem 2022-2023 bad ula kular ruh ban bthah ia u kontraktor ban maramot ia kane ka surok.

Ula pynpaw iaka jingbynniaw ba u kontraktor ula wan ban maramot malu mala ia kane ka surok kata ruh hashwa ka jingpynlong iaka Jingiaseng jong ka War Jaintia Presbytery bad hadien ka Jingiaseng Pressbytery ula iehnoh khlem maramot haduh kine ki sngi.

“Ngi pynrem jur ia une u kontraktor bad lada ki bor ba dei khmih kim maramot ia kane surok hapoh u bnai Nailur ka dorbar shnong kam banse ban iaid shakhmat namar ba kane ka surok ka kylla long maw jynthut iaka leit ka wan, ka kit ka bah bad ka pang ka shitom iaki paidbah nongshong shnong kiba pyndonkam ia kane ka surok”, la ong u Ma Tariang.

U General Secretary Synjuk Waheh shnong Ri Jaintia bad General Secretary Synjuk waheh shnong Amlarem bad uba dei ruh u Waheh shnong ka Amlarem u Ma Kampher Pohlong ula ong katkum ka jingmang jong kane ka surok dei ban maramot hapoh 5 snem lada don kano kano ka jingdawa hynrei lada peit iaka jinglong jingman jong kane ka surok mar sien dep shna tang hadien katto katne bnai ka surok kala sniew bad jot rathai.

U Ma Pohlong ula kyntu iaka tnad PWD South Jowai Division naduh ki EE kumjuh ki Overseer ba kin wan jurip da lade iaka jinglong jingman jong kane ka surok khnang ba kum kine ki kontraktor nangne shakhmat dei ban da phikir shwa ban sanction iaki ia kino kino ki work order.

Kum kine ki jait skhim kham ñiar ban ioh man la ka por bad katkum ka work order ba hapoh 5 snem lada don kano kano ka jingdawa dei ban maramot shisien lane arsien shisnem, hynrei ha kaba iadei bad kane ka surok naduh ba la dep pyntrei ym don kano kano ka jingmaramot hynrei la shu wan buh tang iaki maw ki shyiap ban pynthame iaki paidbah nongshong shnong”, la ong u Ma Kampher Pohlong.