Shah iuh trok ka longkmie ha Nongtalang

Syllad | The Rising MeghalayaApril 23, 2021

Kawei ka longkmie kaba la tip kyrteng kum ka Joplin Tongper kaba khot sin Kong Dari kala khlad noh hadien ba shah iuh ka trok kit mawshun ha Nongtalang.

Kane jingjia kala jia haka sngi Palei ha Nongtalang Thymmai, Amlarem Sub Division.

La iathuh ba kane ka longkmie ka dei ka nongkhaii mawshun kaba mat Bakur kala ieng haka bynta ba shadien ka trok bad kumno re kumno kynsan kala leit rung hapoh khrum trok bad shah iuh.

Ki paidbah kiba iohi ia kane ka jingjia mar mar kila lah rah iaka sha Nongtalang CHC, hynrei namar bala jur ka jingmynsaw kane ka longkmie kala khlad noh.

Ki paidbah ka thain Nongtalang, Dawki bad kiwei kila pynpaw ka jingsngewsih halor kane ka jingjia bad kila lap ruh haka por ba jia ki jingjia aksident ka shitom bha ban iarap iaki paidbah kiba ngat haka kum kane ka apot namar ba Nongtalang CHC ka don shibun jingduna ban sumar iaki case aksident.

Nalor kata ban pynkit iaki ba mynsaw ruh ki shem jingeh bha namar ba ka thain war Jaintia kam don Ambulance ban kit nongpang.

Ki paidbah ka thain War Jaintia daka mynsiem kaba sngewkhia kila kyrpad rit ia u nongmihkhmat badon burom u ma Lahkmen Rymbui ban pynbiang iaki lad ai jingsumar ia kiba aksident bad kiwei kiwei jingpang jingshitom kiba kyrkieh.