Shah jied biang Dr Sankey Shangpung kum u Chairman ka JHADC, mih paw lai tylli ki NOTA

Syllad | The Rising MeghalayaFebruary 28, 2025

U MDC jong ka National People’s Party (NPP) na Bataw Lakadong Constituency, u Dr. Sankey Shangpung ula shah jied biang kum u Chairman jong ka Jaintia Hills Autonomous District Council (JHADC) hadien ba ula pynrem ia u MDC jong ka Seng Congress na Saphai Sahsniang u Ma Rikut Parien ha ka eleskhon bala iashim bynta baroh khoit ki MDC.

La pyniaid ia ka elekshon jied Chairman jong ka JHADC da u Deputy Commissioner jong ka West Jaintia Hills District u AK Singh hynne ka sngi 28 tarik Rymphang ha iing dorbar jong konsil, Jowai.

U Singh u la pynbna ba ki don arngut ki MDC kata u Dr. Shangpung bad u Ma Rikut N. Parien kiba la thep kyrteng ban aireng ia ka shuki Chairman bad kumta hap ban pynlong ia ka jingthep vote.

Hadien ka jingthep vote da ka secret ballot, u Dr Shangpung ula ioh haduh 20 votes, katba u Ma Rikut N. Parien MDC jong u Congress ula ioh 6 vote bad u NOTA 3 vote.

Kaba phylla, ka long ba ki don kiwei pat ki dkhot na kiwei ki party kiba jied ia u Dr Sankey, katba u Rikut ula ioh tam 3 vote wat hadien ba ka party Congress kala jop da 3 seat ha kane ka kynti ha JHADC.

Kaba sngew thamula shuh shuh ka jingmih paw ka vote NOTA, wat hadien ba kam don ha ka ballot ban jied ia kane (NOTA) ha kaba kila don ki MDC kiba thoh hi da ka kti ia kane ba kim mon ia kine ki ar ngut ki Chairman.

Ka jingmih paw kane ka vote NOTA, ka kdew shai wat hadien ba kine ki MDC kila shah jied ha u paidbah, la sakhi ba para MDC kiba shah jied ruh kim don ka jingshah niah. Ka jingkylli ka long kumno kin king ia ka JHADC?

Ha kane ka samoi kaba mynta; ka NPP ka don 14 ngut ki MDC, ka VPP ka don 8 ngut, ka Congress 3 ngut bad Independent-1.