Shah jied haduh 11 ngut ki rang bad thei iakhun kti ka jylla ban leit ai aireng sha Kazakhstan

Syllad | The Rising MeghalayaAugust 18, 2023

Lehse kan long ka burom kaba khraw ia ka jylla Meghalaya hi baroh kawei namar ki la don haduh haduh 11 ngut ki rang bad ki thei iakhun kti (arm wrestler) na ka jylla kiba la shah jied hapoh ka lama jong ka Meghalaya Arm Wrestling Association ban leit mihkhmat ia ka ri India sha ka rynsan  iakhun kti kaba heh ne ka world championship, ka ban long ha Kazakhstan.

Nalor kata kaba kham sngewtynnad ka long ruh ba nalor ka jingshah jied jong kine ki 11 ngut ki rang ba thei iakhun kti, u Banbatjubab Khongwir u la shah jied syndon ban long kum u nonglamkhmat ne u kapten jong ka kynhun ialehkai ka ri ban iakhun sha Kazakhastan.

Haba kren sha kad lad pathai khubor na ka liang u Bah June Kharbuli President ka MAWA u la pynpaw  ka jingkmen kaba khraw ban iohi ba ka jylla kan ioh ia kaba kum kane ka kabu ksiar ban shah jied na ka bynta ban mihkhmat ia ka ri.

U la ong ruh ba kine kiei kiei baroh ki la wan urlong dei namar ka jinglong ba la kloi naduh u Myntri Rangbah ka jylla u Conrad K Sangma, u Bah Shakliar Warjri Myntri ba dei khmih ia ka tnat Sports, u Dr Vijay Kumar D Commissioner Secretary, Kong Isawanda Laloo Director bad kumjuh ki riew kylluid mynsiem kiba ju  iai kyrshan ia ka synjuk na  ka por sha ka por.