Shah jied ka Kiang Nangbah Govt College ban iashim bynta haka Swavalambini Pilot Project

Syllad | The Rising MeghalayaFebruary 9, 2025

Ka Kiang Nangbah Government College ka la shah jied ban iashim bynta ha ka Swavalambini Women Entrepreneurship Programme, kaba dei ka seinjam ba la pyntreikam da ka Ministry of Skill Development and Entrepreneurship (MSDE) ha ryngkat ka jingiatreilang bad ka NITI Aayog.

Kane ka prokram ba la plie ha ka 7 tarik Rymphang ka thmu ban pynkup ia ki samla pule kynthei da ki sap ki phong ha ka liang ka sengkam seng jam, ki jingai jingmut bad ki jingkyrshan ban kyntiew ha ki jingtrreikam.

Ia kane ka jingialang plie paidbah ba la pynlong lyngba ka online la plie da u Jayant Chaudhary, Myntri khynnah ka Sorkar Pdeng (Independent Charge), MSDE uba la kdew halor ka jingdonkam ia ki karkhana ba la ialam da ki kynthei na ka bynta ban kyntiew ia ka ioh ka kot bad ka roi ka par.

Ka Anna Roy kaba dei ka Economic Advisor ka NITI Aayog bad u Atul Tewari, Secretary MSDE ki la ai ruh ka jingkren ha kane ka jingialang da kaba pynpaw ia ka jingktah jong kane ka jingthmu.

Ha ryngkat ka Kiang Nangbah Government College, ki la don phra tylli kiwei pat ki jaka pule ha ka kyrdan Higher Education Institutions (HEIs) na Meghalaya, Mizoram, bad Assam kiba la shah jied.

Na Meghalaya – Ki kynthup ia ka Ri-Bhoi College (Ri-Bhoi) bad ka North Eastern Hill University (NEHU, Shillong).

Mizoram – Ka Government Champai College, Lunglei Government College, bad Mizoram University.

Assam – Gauhati University, Handique College bad Dispur College.

Baroh ki don haduh 600 ngut ki samla pule kynthei na kine ki jaka pule ki ban iashim bynta ha kane ka Entrepreneurship Awareness Programme (EAP), ha kaba 300 ngut la jied na ka bynta ka Entrepreneurship Development Program (EDP).Ka jingthmu ka kynthup ia 21 taiew ( 6 bnai) jong ka jinghikai bad jingkyrshan kaba thmu ban seng ym duna ia ka 30 tylli ki karkhana ba la ialam da ki kynthei.

Ka jingjied ia ka Kiang Nangbah Government College ka dei ka sienjam kaba kongsan ban kyntiew ia ka seng kam seng jam jong ki kynthei ha West Jaintia Hills, kaba ai ia ki samla pule ia ki sap ki phong bad ki jingiarap ba kongsan na ka bynta ban seng ia la ki jong ki kam ki jam.