Shah jied ka Meghalaya ban pyntreikam ia ka skhim ban tehlakam ia ki jingpluh ding ki khlaw

Syllad | The Rising MeghalayaJanuary 30, 2025

Ka High Level Committee (HLC), hapoh ka jingialam u Myntri ka Tnad kam Pohiing bad Cooperation u Amit Shah ka la mynjur ia ka song pisa kaba T.3027.86 klur na ka bynta ka Disaster Mitigation Project sha ki jylla bapher bapher.

Ka Committee kaba kynthup ia ka Myntri Pla Tyngka, Myntri ka rep ka riang bad Vice Chairman NITI Aayog kum ki dkhot ki la ai ka jingmynjur ia ki Mitigation Project on Lightning Safety ban iada na ki jingpom pyrthat ha ki 50 tylli ki district kiba ngat khah khah ha ki jingjia shah pom pyrthat ha ki 10 tylli ki jylla bad ka catalytic assistance sha ki 49 tylli ki District ha ki 12 tylli ki jylla kiba mad ia ka jingring tyrkhong ba khah khah ban ioh ia ka jingbei tyngka na ka National Disaster Mitigation Fund (NDMF).

Ka High Level Committee ka la mynjur ia ka project ban aijingiarap sha ki 12 tylli ki jylla kiba ju ngat ha ka jingtyrkhong um ha ka jinglut kaba kot T.2022.16 klur, ha kaba ka bhah na ka sorkar pdeng kan long T.1200 klur. Kine ki 12 tylli ki jylla ki kynthup ia ka Andhra Pradesh, Bihar, Gujarat, Jharkhand, Karnataka, Madhya Pradesh, Maharashtra, Odisha, Rajasthan, Tamil Nadu, Telangana bad Uttar Pradesh.

Ka Committee ka la mynjur ruh ia ka jingiarap sha ki 10 tylli ki jylla kiba mad khah khah ia ki jingjia shah pom pyrthat ha ka jinglut kaba T.186.78 klur na ka bynta ka Andhra Pradesh, Bihar, Chhattisgarh, Jharkhand, Madhya Pradesh, Maharashtra, Meghalaya, Odisha, Uttar Pradesh bad West Bengal.

U Myntri kam Pohiing u la mynjur ruh ia ka Mitigation Scheme for Forest Fire Risk Management ban pyntreikam ha ki 144 tylli ki District kiba don ha ki 19 tylli ki jylla ha ka jinglut kaba kot T.818.92 klur, ha kaba ka sorkar Pdeng kan bhah lyngba ka NDMF bad NDRF ka ban long T.690.63 klur.

Ka jingthmu ba kongsan jong kane ka skhim ka long ban pyntreikam ia ki lad ban iada na ki jingpluh ki khlaw ki btap hapoh ka ri bad ban pynkhlain ia ki jingkyrshan ban iada ia ka jingpluh ki khlaw ki btap kiba kongsan bad halor ki lad jingiada.

Ka jylla Andhra Pradesh, Arunachal Pradesh, Assam, Chhattisgarh, Gujarat, Himachal Pradesh, Jharkhand, Karnataka, Kerala, Manipur, Maharashtra, Mizoram, Madhya Pradesh, Meghalaya, Nagaland, Odisha, Tamil Nadu, Telangana bad Uttarakhand kin hap ban aiti ia la ki jingtyrwa ki jong ki na ka bynta ban pyntrei ia ki kam bapher bapher na ka bynta ban iada ia ki khlaw na ki jingpluh ding, ki jingpynkhreh ban shim ia ki sienjam haba don ki jingpluh khlaw bad ban khmih bniah ia ka jinglong jingman bad ban khyllie bad pynbha pat ia ki khlaw ki btap.

Da ka jingthmu ban pynurlong ia ka jingiohi jong u Myntri Rangbahduh ka ri u Narendra Modi, ka Ministry of Home Affairs hapoh ka jingialam jong u Amit Shah ka la shim ia ki katto katne ki sienjam ban pynthikan halor ka jingpyntreikam pura ia ki lad jingiada na ki jingwan lyngshop ki bor ka mariang hapoh ka ri.

Hashwa ia kine ki jingtyrwa, ka HLC ka la mynjur ia ka jingiarap pisa na ka NDMF na ka bynta kiwei pat ki project, kum ka Urban Flood Risk Mitigation Projects ha ki hynniew tylli k sorbah kiba kongsan ha ka jinglut kaba T.3075.65 klur, GLOF Risk Management ha ki 4 jylla ha ka jinglut kaba T.150 Klur bad ka Landslide Risk Mitigation ha ki 15 tylli ki jylla ha ka jinglut kaba kot T.1000 Klur.

Shuh shuh haduh palat T.24,981 klur la dep ban pyllait sha ki jylla ha une u snem mang tyngka. Kane ka kynthup ia ka T.17479.60 klur na ka  State Disaster Response Fund (SDRF) jong ki 27 tylli ki jylla, T.4808.30 klur na ka National Disaster Response Fund (NDRF) sha ki 18 tylli ki jylla, T. 1973.55 Klur na ka State Disaster Mitigation Fund (SDMF) sha ki 13 tylli ki jylla bad T.719.72 Klur na ka National Disaster Mitigation Fund (NDMF) sha ki 8 tylli ki jylla.