Shah jied ka MP Rajya Sabha ka Nagaland kum ka dkhot sha ka kashari ka skulbah NEHU

Syllad | The Rising MeghalayaApril 20, 2025

Ka S Phangnon Konyak, Member ka Parliament, Rajya Sabha ka Nagaland ka la shah jied kum ka dkhot sha ka kashari jong ka skulbah North-Eastern Hill University (NEHU) lyngba u Vice President ka Ri India bad Chairman jong ka Rajya Sabha kaba la sdang treikam naduh ka 15 tarik Iaiong 2025, ong ka jingpynbna na ka Rajya Sabha Secretariat.

Na ka liang ka Bharatiya Janata Party (BJP) ka Jylla ka la shim ia kane ka jingshah jied jong ka Konyak kum ka khyllipmat kaba sngew sarong bad ka burom kaba khraw.

“Hadien ba la seng ia ka ha ka 19 tarik Naitung 1973 lyngba ka Ain jong ka Parliament, ka NEHU ka la ieng slem kum ka jaka pule kaba hakhmat eh ha ka thain Shatei Lammihngi jong ka ri India. Ka jingtreikam jong ka ha kaba nyngkong la pyniar sha ka jylla Meghalaya bad Nagaland, ryngkat bad ki Union Territory ha kata ka por ka Arunachal Pradesh bad Mizoram.

Ha kine ki phewtylli ki snem kiba la dep, ka NEHU ka la shim ia ka bynta kaba kongsan ban pynwandur ia ka jinglong jingman ban kyntiew ha ka liang ka jingstad jingshemphang bad ha ka rukom pyniaid ia ki jingtreikam hapoh ka thain. Kane ka skulbah ka la pynroi ia ki pateng jong ki riewstad riew shemphang, ki nongsynshar, ki nongialam paidbah bad ki nongwanrah jingkylla bad kaba la noh synniang shibun sha ka jingroi jong ka ri hi baroh kawei,” ong u kyrwoh.

Ki nongialam ka BJP ka Jylla ki la ong ba ka jingshah jied jong ka Konyak ka pyni ia ka jingaiti jong ka ha ka jingshakri paidbah bad ka jingiadei kaba jylliew ha ka liang ka pule puthi bad ka jingangnud ban kyntiew ia ka roi ka par jong ka thain Shatei Lammihngi.

“Ka jingiadei ka jong ka bad ka NEHU kan nangpynsawa jam ia ka thong jong ka Skulbah kaba ong; “Rise Up and Build,”. Kane ka jingshimti la khmih lynti ba kan nangpynkhlain shuh shuh ia ka jingiadei jong ka jaka pule bad ki paidbah jong ka thain bad kan kyrshan ia ka jingpyrshang jong ka ban nangkyntiew ia ka jingnang jingstad bad ka roi ka par ha baroh ki liang,” la bynrap.