Shah jied ka skul Mynken ban leit iashim bynta sha ka lympung ‘Indo-French Football Tournament’ ha Paris
Ki khynnah ialehkai U-17 na ka skul Mynken Christian HSS, Ri Bhoi District ki la shah jied ban mihkhmat ia ka India sha ka lympung ialehkai “2nd Indo-French Football Tournament ka ban long ha Paris naduh ka 25 tarik Naiwieng u ban wan.
Ka skul Mynken CHSS ka dei kaba shah rem noh ha ka jingialehkai final jong ka “63rd Subroto Cup International Football Tournament” kaba dang shu kut shen ha Bengaluru ha ka TG English School na ka Jylla Manipur.
Ia kine ki artylli ki kynhun la khot sngewbha da ka Mukherjee Sports Education Society ba kin mihkhmat ia ka India sha katei ka lympung ialehkai ka ban long ha Paris.
Haba ai khublei ia kane ka kynhun na ka Jylla, u Myntri Rangbah, u Conrad K Sangma u la ong, “Barabor Nga don ka jingshaniah kaba skhem ha ka sap ialehkai ba tbit jong ka kynhun ki khynnah jong ngi. Ki khynnah ka Mynken Christian HSS ki la pynpaw sha ka ri ia ka jingkut jingmut ba skhem bad nga sngewkmen ban iohi ia ki ba kin ioh mihkhmat ia ka India ha ka sorbah kaba dang shu pynkut shen ia ka jingialehkai Olympic. Nga kyrmen ba kin nangsan bad nangkhlain bad long ka nuksa kaba ai mynsiem ia kiwei pat bad kitbok kyrpang ruh ha kane ka jingleit iashim bynta ha ka Indo-French Football Tournament”.
Na ka liang u Myntri ka Tnad Sports ka Jylla u Bah Shakliar Warjri ruh ha ka jingkren u la ong,”Kine ki khynnah ialehkai ka Jylla ki la lah ban pynpaw ia ki sap ki phong jong ki lyngba ka lympung Subroto kaba dang shu kut shen. Ka long ka jingsarong kaba khraw ia ka Jylla ban sakhi ia ki khynnah ialehkai ha ka rynsan jong ki ri ka pyrthei bad ban ioh mihkhmat ia ka Ri.”
Kane ka lympung ialehkai kan long ha Complexe Sportif Marcel-Cerdan ha Paris ha kaba kin don 10 tylli ki kynhun ki ban ialehkai na Ri-India bad na France kumjuh.
Facebook
Instagram
Youtube
Twitter
Leave a Reply