Shah jied u Dawyoo Lyngdoh kum President KNGCSU

Syllad | The Rising MeghalayaAugust 14, 2019

JOWAI: U Dawyoo Lyngdoh ula shah jied kum u President ba thymmai jong ka Kiang Nangbah Government College Student Union (KNGCSU) hadien ba ula jop da 194 vote pyrshah ïa u Samson Rymbai haka election kaba long haka sngi Balang.

U Dawyoo Lyngdoh uba pule haka kyrdan BSc 5th Semester ula ioh vote da 634 vote, katba u Samson Rymbai ula ioh vote 449 vote.

Na ki 3000 ngut ki samla pule kane ka kolej la wan ban thep vote 1100 ban jied ïaki nongialam ba thymmai ka KNGCSU na ka bynta ka samoi treikam 2019-20.

Ha kane ka jingjied nongkitkam la don 32 ngut ki kyrtong ba kynthup iaki samla pule kynthei bad samla pule shynrang kiba iakhun na ka bynta ki 12 tylli ki kam jong ka Union.

Ka kam Vice-President la jop da Samborlang Shylla, General Secretary la jop da u Wanbiang Pulang, Assistant General Secretary la jop da u Ajay Chyrmang.

U Sanborki Biam ula shah jied kum u Student- Editor, ka June Meris Suchiang kum ka Secretary Cultural Affairs (Music & Drama), u Chanianga Rabon kum u Secretary Debate & Symposium, u Victory Phawa kum u Secretary Indoor Game & Sports, u Hamewanpynhun Ryngkhlem kum u Secretary Outdoor Games & Sports, u Vicky A. Lamare kum u Secretary Social Service, u Selman Shylla kum Secretary Boy’s Common Room bad ka Ibadashisha Dkhar kum ka Secretary Girl’s Common Room.

U Dawyoo Lyngdoh President bathymmai ka KNGCSU ula kular ban buddien ïaki mat jingdawa jong ka kolej kata naduh ka madan ialehkai, ka ai rong ai rup iaka kolej bad ban sdang iaki course ba thymmai ka kolej bad kiwei kiwei. Ula kyntu ia baroh ki samla pule ban iatreilang da ka mynsiem iatylli khnang ban kin ioh iaki jingangnud ka union bad ka kolej baroh kawei.

Baroh kine ki nongialam thymmai kila shim ka jingkular ban trei iaka bha ka miat ka kolej hakhmat u Principal Kiang Nangbah Government College u S.De.