Shah jied u Hamletson Dohling kum u vice president ka NEFDC

Syllad | The Rising MeghalayaJune 25, 2024

Ki Synjuk ialehkai Phutbol jong baroh ki 8 tylli ki jylla ka thain shatei lammihngi ki la iakynduh lang haka 22 tarik Jylliew ha ka nongbah Guwahati, Assam ban pyniaid shakhmat ha kaba iadei bad ka jingseng ia kawei pat ka Synjuk ba la tip kum ka North East Football Development Council (NEFDC) ha kaba u President ka Meghalaya Football Association u bah Hamletson Dohling u la shah jied kum u Vice President.

Kiwei pat ki nongkitkam jong kane ka Synjuk ki kynthup ia u President u Lainghinglova Hmar uba dei ruh u president jong ka Mizoram Football Association bad ha ka juh ka por u Myntri ba dei khmih ia ka tnat Sports and Youth Welfare ka Mizoram bad u Secretary u Kipa Ajay uba dei u Treasurer jong ka AIFF bad Secretary General ka Arunachal Pradesh Football Association.

Haba iakren bad ka lad pathai khubor, na ka liang u bah Hamletson u  pyntip ba ka rai kaba nyngkong jong ka NEFDC hadien ba la pynkhie im biang ia kane ka kynhun ka long ban iaid shakhmat na ka bynta ban pynlong ia ka lympung ialehkai  ka Dr T. Ao ia kaba la khmih lynti ban pynlong mynta hi u snem.

Ka rai kaba ar na kane ka jingialang ka long ban khreh wat ban pynlong sa ia kawei pat ka lympung kata ka North East Champions League, ka lympung ban plie lad ia ki team na ki jylla ka thain shatei lammihngi ba kin ioh ban ia aireng hapdeng para ki, tangba ia ka rai kaba khatduh halor kane kawei pat ka lympung yn sa shim biang ha kawei pat ka jingialang ka NEFDC, la bynrap u bah Hamletson.

Shuh shuh u bah Hamletson u pynpaw ruh ba ka daw tynrai ban pyntreikam ia kane ka Synjuk ruh ka long ba kan peit bad khmih ruh ia ka bha ka miat jong baroh ki nongialehkai phutbol jong ka thain kiba mihkhmat ia ka ri bad ia kiba bun tylli ki klob ialehkai phutbol kiba don ha ka ri, kata kam pher  lada jia ba lehse ki player ki shem bad mad ia kino kino ki jingeh  kaba ki donkam ban pynpaw, ha kaba na ka liang ka NEFDC kan shim khia ban iarap ia ki khun samla jong ka thain.