Shah jied u samla pule Chemistry ka USTM na ka bynta ka European Union scholarship

Syllad | The Rising MeghalayaMarch 29, 2024

U samla pule BSc ka University of Science and Technology Meghalaya (USTM) u la shah jied na ka bynta ka Erasmus Mundus Scholarship na ka bynta ka MSC prokram Materials for Energy Storage and Conversion (MESC) ha ka European Union.

U Mustafizur Rahman uba dang pule ha ka 6th Semester BSc na ka Department Chemistry hapoh USTM u dei napdeng ki 36 ngut ki samla ha ka pyrthei kiba la shah jied na ka bynta kane ka prokram, bad u ban long ruh u samla pule ba nyngkong eh na ka thain Shatei Lammihngi (North East) u ban shah jied na ka bynta kane ka prokram MESC.

Kane ka scholarship ka kynthup ia ki university ha Poland, France, Spain, Slovenia bad USA.

Ka email na u  Prof Alejandro A. Franco, i-MESC EMJM Coordinator, France ka ong ba hadien ka jingbishar bniah ia ka aplikeshon jong u Mustafizur, ki la pynhap ia u ha ka kyrdan jong ka list kaba kongsan napdeng ki samla kiba la shah jied bad ba u dei hok ban ioh rung na ka bynta ka Erasmus Mundus Joint Master Scholarship ban bteng ia ki jingpule hapoh jng ka  i-MESC, ka ban sdang naduh u bnai Nailur 2024. Kane ka EMJM scholarship na ka  European Commission ka kynthup ia ka allowance kaba 24 bnai kaba long 1,400 Euro (baroh ka ban long 33,600 Euro) kata ka ban kynthup ia ka leit ka wan jong u, ka visa, ki jingpynkhreh ia ki jingdonkam bad kiwei kata nalor ka jingpyndep ba pura ia ka registration ka bym donkam siew.

Haba pynpaw halor kane ka jingjop kaba khraw, u Mustafizur Rahman u la ong, “Nga kwah ban ai khublei kyrpang ia ka European Commission halor kane ka scholarship kaba kongsan.Nga ai khublei ia u supervisor jong nga, u Dr Sarifuddin Gazi uba u professor uba la shemphang bha bad khlieh jong ka Dept Chemistry, USTM halor ka jingiai bteng ban btin lynti bad ban ai mynsiem ia nga ha baroh ka BSc course.”

Ha kaba iadei kane ka phang, na ka liang u Dr Golam Mohiuddin. Assistant Professor, Dept of Chemistry ha USTM ula ong, “Ngi sngewkmen shibun.Ha kaba khatduh ki jingpyshang lang ki la wanrah ia ka jingjop ha ka rynsan jong ki ri ka pyrthei.Kane ka Erasmus Mundus Scholarship na ka bynta ka MSC (Materials for Energy Storage and Conversion-MESC) na ka European Union ka dei ka dei kaba jur bha ka jingialeh.U la ong ruh ba ki samla na ki jaka pule ba hakhmat eh kum ka IIT, bad IISER ki dei kiba shah jied na ka bynta kane ka scholarship.

“Ka Dept of Chemistry ka USTM ka la jam sha ka rynsan ong ki ri ka pyrthei ha ka liang ka pule pule bad ka jingwad bniah lyngba ka jingjop da ki samla pule jong ngi.Kyrmen ba ha ki sngi ki snem ki ban wan, ngin lah ban pynmih shuh shuh kiba kum kine ki samla pule ki ban wanrah burom ym tang ia ka department bad ka University hynrei ia ka Ri hi baroh kawei.Ki ai ka jingkhublei kaba kyrpang na ka bynta jong u,” u l ong shuh shuh.