Shah kem 10 ngut ki dkhot ka HNYF ba khang ia ki kali Tourist Assam ha Umtyngngar

Syllad | The Rising MeghalayaJuly 27, 2024

Kumba shiphew ngut ki dkhot jong ka Seng Hynniewtrep National Youth Front (HNYF) ki la shah kem ha ki bor pulit hadien ba ki la pynlong ia ka jingtalasi bad pynphai noh ia ki kali tourist kiba wan na Assam ban leit sha ka thain Sohra bad Dawki ha Umtyngngar.  

Na ka liang u Superintendent of Police ka East Khasi Hills u Bah Sylvester Nongtnger u la ong ba ki pulit ki la register case pyrshah ia kine ki 10 ngut kiba la shah kem halor katei ka jingjia.  

U President ka HNYF u Bah Sadon K Blah ula ong ba kane ka jingtalasi ia ki kali Tourist ka dei kaba la leh ban phah ia ka khubor kaba shai sha ka Sorkar Jylla ba kan buh noh mardor ia ki Entry-Exit Point kumba la kdew ha ka Meghalaya Residents Safety and Security Act (MRSSA), 2016, kaba ong ba ‘Wat ki nongshangkai pyrthei kin hap ban pyni ia ki kot ki sla kiba biang ban pynshisha ba ki wankai sha Jylla kum ki nongshangkai pyrthei”.     

Nalor kata u la ong ruh ba ka jingbym lah jong ka Sorkar ban buh ia ki Entry-Exit Point kala pynbor ia ki dkhot ka seng HNYF ba kin shim hi ia ki sienjam kiba dei ban leh. “Hooid ngi kubur ba ka ktah iaki nongwan shangkai hynrei ngim pynlong sohpdung ia ki nongshangkai hynrei ngi kwah ia ka Sorkar ba kan pyntrei ia ka MRSSA” ula bynrap.

Haba shim ia kane ka jingjia kum ka jingjia kaba sngew bynniaw, u Symbud Myntri Rangbah uba khmih ia ka tnad kam Pohiing (Police) u Bah Prestone Tynsong u la ong, “Kane ka jingjia kaba la jia hynne ka sngi Thohdieng ka dei ka jingjia kaba sngew bynniaw bad sngewsih bad ngim don jingtip satia bad ngim shym la khmih lynti ruh ba kin don katto katne ki kynhun ki ban shu pynlong ia ka jingtalasi ia ki nongshangkai pyrthei kiba thmu ban leit shangkai sha ka thain Sohra bad Dawki.”  

Nalor kata u la kular ruh da kaba ong, “Shah ngan ong ha phi da kaba shai ba ka ain ka la shim ia la ka jong ka sienjam. Ngin ym ailad ia kum kine ki jingjia ba kin dang wan jia biang.” 

“Nga pynpaw biang da kaba shai ba ia kano kano ka mat kaba phi don, ngi don hangne ban iakren, ka jingkhang ka plie ban iakren. Wan shong ban iakren bad ngin sa shim ia ka rai, kane ka long kaba kongsan. Hynrei kane ka jingleh jong kine ki khynnah samla hynne ka sngi ha Umtyngngar, Nga tharai ka dei kaba bakla shibun,” ong u Bah Prestone.  

Katba ha kaba iadei bad ka jingjia kawang petrol bom pyrshah ia kawei ka iing ha Jhalupara, Shillong, une u Myntri u la ong ba ym pat shym la ioh kem iano iano ruh halor kane ka jingjia, hynrei ki pulit ki la iaid shakhmat ban pynlong ia ka jingtohkit ban lapdien ia kine ki briew kiba donkti ha kane ka kam pyntriem.