Shah kem 11 ngut kynthup ki nongtrei MeECL haka kam thang ïing ha Rymbai

Syllad | The Rising MeghalayaMarch 10, 2023

Khatwei ngut briew kiba kynthup iaki nongtrei MeECL kila shah kem ha ki Pulit jong ka East Jaintia Hills District halor ka jingsuba donkti ban thang ïa kawei ka iing haka shnong Rymbai.

Ka khubor pulit ka iathuh ba haka 8 tarik Lber haka por 10:45 Pm kala don ka jingjia shah thang iing haka shnong Rymbai ha Rymbai Iawpynsin haka kynhun jong ki runar.

La iathuh ba kane ka iing ka dei jong u waheh shnong barim ka Rymbai.

Ha kane ka jingjia ki paidbah nongshong shnong kila iohbat ia u uwei u briew uba kyrteng u Deishim O Lamurong (26 snem) na Rymbai Shynrang Sakhain haka por ba u thang ia kane ka iing, katba kiwei pat ki paralok jong u kila ioh ban phet krad namar ka jingdum.

Shuh shuh uwei pat uba la tip kum u Heisalon Dkhar uba trei ha MeECL Control Room uba suba donkti ban iasylla lang ha kane ka kam, ki pulit kila kem ia u hadien ba u shah kynnoh ba u donkti ban pynlip iaka bording shuwa ban thang ia kane ka iing.

Ha kaba iadei bad kane ka jingjia thang iing ki pulit kila register case ha Khliehriat PS (Case No. 18(3)2023 u/s 120B/307/427 /436/506/34 IPC)

Ki Pulit haba tohkit shuh shuh ia kane ka jingjia, la lap ba kane ka kam thang iing la sylla ka kynhun jong bun ngut ki briew bad ki pulit kila thwet ia kine ki runar. Haduh bala thoh iaka khubor kiba shah kem ki don haduh 11 ngut.

Nalor u Heisalon Dkhar (33 snem), ki pulit kila ioh kem ruh ar ngut kiwei pat ki nongtrei ka MeECL kiba kynthup ia u Elius Wanniang (40 snem) uba naka shnong Mawkyrwat bad u Rishotlang Bareh (31 snem) na Khimmusniang, Jowai. La kynnoh ba kine ki nongtrei MeECL kidei kiba iarap ia ki runar ban pynlip iaka bording ha Rymbai.

Kiwei pat kiba shah kem ki dei u Bakstar Dkhar (32 snem), u Cherishme Dkhar (23 snem), Eborlang Nongtdu (35 snem), Emerson Dkhar (25 snem), Roilang Dkhar (36 snem), Henry Shangpung (32 snem) bad u Thynda Lyngdoh (36 snem). Baroh kine ki dei naka shnong Rymbai Synrang Sakhain.