Shah kem 18 ngut halor ka jingklumar ha Tura donkti ki nongialam ka BJP bad TMC

Syllad | The Rising MeghalayaJuly 25, 2023

Kila don baroh haduh 18 ngut ki briew kaba kynthup ia arngut ki kynthei kiba la shah kem noh ha ki bor pulit halor ka jingdonkti ha kaba pynmih jingklumar bad ther maw ia ka ophis CMO ha Tura ha ka janmiet jong ka sngi 24 tarik Naitung ha sor Tura, kata ha ka por ba u Myntri Rangbah ka jylla u Conrad Sangma u la khot pynlong ia ka jingiakren bad ki seng bhalang kaba kynthup ia ka Seng Achik bad kiwei pat.

Napdeng kine kiba la shah kem ki kynthup ruh ia ki arngut ki kynthei kiba dei ki nongialam jong ka seng Bharatiya Janata Party (BJP) ia kiba la tip kyrteng kum ka Bellina M. Marak bad ka Dilche Ch. Marak.

Kiwei pat kiba dei ki shynrang kiba la shah kem halor ka jingdonkti ha kane ka kam pynmih jingklumar ki kynthup na ka BJP ki dei Bartho Ch. Sangma (19) na Jarangpara, Dalu, WGH, Salseng Ch. Momin (28) na Ringgi Songittal, Araimile, WGH, Brendip R. Marak (34) na  Purakhasia, Dalu, WGH, Akanrik M. Sangma (21) na Dakopgre, Araimile, WGH, Khuswant M. Sangma (33) na ITI Quarter, Dakopgre, Tura nalor ka Bellina bad ka Dilche.

Naka TMC ki dei u Bregrimseng S. Marak (19),na Dopil Songittal, Baghmara, SGH, Pangchu R. Sangma (18), Gangga Awe, Siju, SGH, Kimkim K. Sangma (32) na Machokgre, Tikrikilla, WGH, Lastbirth M/ Marak (23) na Morengapara, Ampati, SWGH, Sangra R. Marak (32) na RC Compound, Baghmara, SGH, Greatster N. Marak (27) na Sonamite, Ampati, SWGH, Tengchang D. Sangma (20), na Siju, SGH, Tengma Ch. Marak (28) na Chapahati, Mahendraganj, SWGH, Jaseng Ch. Marak (40) na Dopagram, Baghmara, SGH, Gamchu R. Sangma (20) na Siju, SGH, Kebin Ch. Marak (28), na Hathmari, Damalgre, SWGH.

Ha katei ka jingmih jingklumar ki la don ruh haduh 10 ngut ki pulit kiba mynsaw kiba kynthup ia u UBI Bitching N Marak, FM Kingstar Ch Momin, ABC/275 Deved R Marak, ABC/177 Gracefield K Sangma, SFC/102 Cliver B Marak, WP/UBSI Esther R Marak, ABC/679 Bikram Chettry, LNK Gopbison R Marak, SFC/141 Lazarus T Sangma, SFC/206 Mrithon P Sangma from Meghalaya Police. Kawei ka volunteer Home Guard ML/HGV Princia S Sangma.

Ki 7 CRPF ki dei u ASI/GD Shesh Nath, ASI/GD Horel Prasad Tiwari, CT/GD C. S. Ronald, CT/GD Nilesh Rathore, ASI/GD Ramjee Singh, CT/GD Amrit Kandula and CT/GD A. K. Lakhikanta.

Lah ban kdew ba ka Nongbah Tura ha ka janmiet 24 tarik myntau bnai ka la sakhi ia ka jingklumar hadien ba ki paidbah kiba ap sha surok ia ka jingiakren hapdeng u Myntri Rangbah Conrad Sangma bad ki sengbhalng ki la lum maw ia ki pulit pahara kynthup ia ki bor pahara jong u Myntri Rangbah kaba la wanrah ka jingmynsaw ia ki bor pahara.

Na ka liang ki pulit ruh ki la hap ban pyndonkam da ki tiar pynsat khmat bad siat sha suin ban pynpra ia u paidbah. Pynban katba nang iaid ka por kane ka jingklumar ka la nang jur hadien ba ki la don kumba laitylli ki kali gypsy ki la shah thang.

Katkum ki khubor la iathuh ruh ba na ka liang u Myntri Rangbah um shym la iohlad satia ban mih na ka ophis jong u ha Tura hadien bun bun kynta namar ka jingshah kerkut ha ki paidbah kiba la khanglad ia u ba un mih tad hadien bas ka jinglong jingman ka la kham jai jai ba ula ioh pat ban mih na kane ka jaka.

Shuh shuh hadien kane ka jingjia ki bor pyniaid district, ki la hap ban pynjari noh da ka korphiw miet ha nongbah Tura bad ruh da ki kyndon section 144 CrPC ha baroh kawei ka nongbah khnang ban tehlakam ia ka jinglong jingman baroh. Na kane ka jingjia la hap khang ruh iaki skul bad ki petrol pump haka sngi ba Ar.