Shah kem 2 ngut ha ryngkat ki tiar siat bad ka doh hati na Ri Bhoi District

Syllad | The Rising MeghalayaMarch 27, 2025

Arngut ki briew ki la shah kem noh ha ryngkat ki tiar siat bad ka doh hati na kawei ka shnong khappud hapoh Ri Bhoi District.

“Ia kine ki arngut kiba la tip kyrteng kum u Qurenius Muktieh 27 bad u Jethril Umbah 32 snem rta la ioh ban bat da ki nongshong shnong jong ka shnong Mawpdeng kaba don ha khappud ka Assam-Meghalaya kaba hap hapoh Umsiang OP, Ri Bhoi District ha ka miet sngi ba Ar ba la lah ha kaba ki la ioh ban kurup ruh ia artylli ki suloi shna hi lem bad ka doh hati kaba la thad tyrkhong,” ong ka khubor pulit.

Hadien la ioh ban pyllait noh ia kine ki arngut na ki kti jong ki paidbah ha kaba la ialam sha ka jaka sumar ban khmih bniah halor ka koit ka khiah ka jong ki.

Ia kine ki tiar siat kumjuh ia kane ka doh hati la kurup noh na ka bynta ban eksamin bniah, ong ki pulit.

Na ka liang ki heh ka tnad Forest ka Sonapur Range kaba hap hapoh Kamrup East Division, Basistha, Guwahati ki pyntip ba ki don haduh artylli ki hati kiba la iap naduh u bnai Naiwieng 2024, ha kaba kawei na kine ki jingiap ka la jia ha ka 16.11.2024 bad ia kawei pat ka metiap la lapdien ha ka 18.03.2025, bad la suba jur ba kine ki briew ki lah ban donkti ha kaba siat mrad beain.

Halor kane ka jingjia la register case hapoh Khanapara police station bad ka jingtohkit ka dang iaid shakhmat.