Shah kem 2 ngut ki dkhot ka KSU ba suba donkti halor ka jingjia ha Ichamati

Syllad | The Rising MeghalayaApril 2, 2024

Ki bor pulit ka East Khasi Hills ha ka miet sngi Nyngkong ba la lah ki la kem noh ia arngut ki dkhot jong ka Khasi Students’ Union (KSU) South Khasi Hills District napoh Sohra halor ka jingshah suba donkti ha kaba iadei bad ka jingjia shah pyniap ba dang shen jong ki arngut ki bar jylla hapoh ka shnong Ichamati, Shella Block, East Khasi Hills.

U Superintendent of Police ka East Khasi Hills, u Rituraj Ravi u la ong ba ia kine ki arngut ki dkhot ka KSU la kem noh ha ka miet sngi Nyngkong ba la lah na Sohra. Hynrei ia mynta hi u la kyntait ban iathuh bniah halor kane ka bynta.

Kine ki arngut ki dkhot ka KSU kiba la shah kem ki dei kiba la tip kyrteng kum u Shambor Shati 26 snem rta bad u Meshadap Sohpen.

Lah ban kdew ba ha ka 27 tarik u Lber ba la dep arngut ki bar jylla ia kiba la tip kyrteng kum u Esan Singh bad u Sujit Dutta kiba dei ki nongtrei bylla hapoh kawei ka par maw la kynnoh ba ki la shah pyniap dusmon ha ki briew ki bym lah ban ithuh ha Ichamati.

Shuh shuh kane ka jingjia ka la wan jia ruh ha ka por ba la pynlong ia ka jingiakhih pyrshah ia ka Citizenship Amendment Act (CAA) ia kaba la khot pynlong da ka Khasi Students’ Union (KSU) bad kiwei pat ki sengbhalang hapoh Ichamati.