Shah kem 2 ngut ki nong Assam ryngkat 57 gram u drok heroin na Mawlai

Syllad | The Rising MeghalayaOctober 9, 2024

Ka Tnad Anti Narcotic Task Force (ANTF) ha ryngkat ki pulit ka Mawlai Police Station ha ka 9 tarik u Risaw ki la ioh ban kem noh ia arngut ki nongkhaii drok kiba dei napoh Assam na ka thain Mawlai bad ioh ban kurup ia u drok heroin uba don ka jingkhia kaba 57.51 gram.

U SP ka East Khasi Hills, u Bah Sylvester Nongtnger ula ong ba kine ki nongkhaii drok kiba la shah kem noh ki dei kiba la tip kyrteng kum u Abdul Mukit (43) uba dei na Siverchak, Kamramganj, Assam bad u Sawrupananda Mohanta (38 snem rta) uba dei na Mohanpur, Cachar, Assam.

U la ong hadien ba la ioh ia ka jingtip kaba thikna, ka tnat ANTF ha ryngkat ki bor pulit ki la pynlong ka jingpynap shrip bad ioh ban bat noh ia kawei ka Tata Sumo kaba wan na Guwahati sha Shillong hajan Banalari Showroom, Mawlai.

Hadien ka jingtalasi ki pulit ki la ioh ban kurup ia santylli ki synduk thep sabon kiba don haduh 57.51 gram u drok heroin. Ki pulit ki la kurup ruh ia ki sawtylli ki mobile phone, kawei ka EPIC card, PAN card, 2 tylli ki ATM card bad kawei ka Driving Licence.

Na ka liang ki pulit ki la register case pyrshah ia kine ki arngut hapoh Mawlai PS bad ka jingtohkit mynta ka dang iaid shakhmat ban lapdien ia kiwei pat kiba donkti.

“Kane ka jingkhynra kaba seisoh ka pynpaw ruh halor ka jingkut jingmut jong ka Tnat pulit ka East Khasi Hills ha ka jingiakhun pyrshah ban rat dyngkhong ia ki kam khaii drok ha ka jylla hi baroh kawei,” ong shuh shuh une u heh pulit.