Shah kem 3 ngut ki nong Bangladesh na ki bynta khappud

Syllad | The Rising MeghalayaDecember 25, 2024

Ki shipai Border Security Force (BSF) ka 04 Battalion ha ka 23 tarik Nohprah  ki la ioh ban kem noh ia laingut ki nong Bangladesh bad arngut ki nong India kiba dei ki nongbtin lynti najan ki bynta khappud jong ka ri na East Khasi Hills.

Kine ki laingut ki nong Bangladesh ki la shah kem noh katba ki dang pyrshang ban jam beain biang shapoh Bangladesh. Ha ka jingtohkit ki la phla ba ki la shong la sah ha Siliguri bad trei kum ki nongbylla sngi ha kane ka jaka.

Nalor kata ki la phla ruh ba ki la ioh ia ka jingiarap lem na kine ki arngut ki nong India kiba la shah kem noh ha kaba iadei bad ka jingthmu ban leitphai biang shapoh Bangladesh.

Ia baroh kine ki briew kiba la shah kem la aiti noh shapoh ka police station ha Pynursla hadien ba la pyndep ia ka medical examination na ka bynta ban leh shuh shuh ia kaba donkam.

Na ka liang ki bor shipai BSF ki dang iai bteng ia ka jingkut jingmut kaba skhem na ka bynta ban aijingiada ia ki jaka khappud jong ka Ri India bad ban tehlakam ia ki kam wan rungtuh bad ia ki khaii beain lyngba ki jaka khappud.