Shah kem 3 ngut kiba na West Jaintia Hills kiba thmu rong tuh ia ka scooty na Shillong

Syllad | The Rising MeghalayaFebruary 16, 2025

Ki pulit ka Sadar Police Station ha ka step jong ka 15 tarik Rymphang ki la ioh ban kem noh ia laingut ki briew katba ki dang thmu ban rong tuh ia kawei ka scooty na ki bynta jong ka Nongbah Shillong.

Kane ka la wan long ruh katba ki bor pulit ki dang pynlong ka jingiaid pahara ha ka nongbah hadien ba ki la iakynduh ia ki lai ngut ki briew ha ka por kumba 4:50 mynstep katba ki dang wan da kawei ka tourist taxi Swift kaba don ia u No ML 04 C 7163 ha ka thain Keating Road kaba ki dang pyrshang ban rong tuh ia kawei ka scooty kaba don ia u No ML O5 AC 8352 da kaba ot bad pyndiat ia u wire ban pynim ia ka enjin.

Ki pulit ha kaba nyngkong ki la ioh ban kem shwa ia u nongniah jong kane ka Swift uba kyrteng u Ribellang Phyllei 25 snem rta uba dei na ka shnong Biar, Laskein Block West Jaintia Hills, katba ia ki arngut kiwei pat ki la ioh ban phet krad da kaba shim kabu namar ka jingdum.

Hynrei, ki pulit ka Mawryngkneng kiba don ha ka jaka talasi ki la ioh ban bat noh ia kine ki arngut ia kiba la tip kyrteng kum u Empyrkhat Dhar 21 snem rta uba dei na Saphai, bad u Steven Syngkon 19 snem rta uba dei na Iaw Thymme, kata katba ki dang thmu ban phet sha ka thain West Jaintia Hills.

Ha ka jingtalasi ki pulit ki la ioh ban kurup noh ia artylli ki helmet, artylli ki bilor plastik kiba don ia ka umphniang petrol, ar set ki screw driver, shi set ki spanner, kawei ka Allen wrench, uwei u T- Hand Hex key, uwei u T- Handle Torx Key, ka pisa T.6100 bad laitylli ki mobile phone.

Na ka liang ki pulit ki la register pyrshah ia kine ki briew hapoh Sadar PS hapoh ki kyndon ain katkum ka section 305(b)/324(4)/111(2)(b)/3(5) jong ka BNS. Ki pulit ki dang pynlong ruh ka jingtohkit ban lapdien shuh shuh ia ka jinglah ban donkti ka jong ki ha kiba bun tylli ki jingjia shah tuh ki kali ar shaka.