Shah kem 4 ngut ki nong Bangladesh ha Byrnihat, Ri Bhoi

Syllad | The Rising MeghalayaOctober 25, 2024

Ki shipai BSF na ka G branch headquarter, Shillong ha ryngkat ki pulit ka Ri Bhoi ha ka 25 tarik u Risaw ki la ioh ban kem noh ia sawngut ki nong Bangladesh kiba wan rungtuh sha poh ka ri na Byrnihat, Ri Bhoi District.

U Superintendent of Police ka Ri Bhoi, u Jagpal Dhanoa u a ong ba kine ki sawngut ki nong Bangladesh ki la shah kem noh hadien ba ki la wan rungtuh sha India na zero-point na Sylhet.

U la ong hadien ba ki la ioh ia ka jingtip kaba thikna na ki BSF kumta ruh ki la pynlong ia ka jingpynap shrip ha Byrnihat bad ha ka por kumba 4:30 janmiet ki la ioh ban bat noh ia kawei ka kali tourist kaba don ia u nombor AS-01-GC-1071 ba la niah da u Md Ali Hussain uba dei na Dhubri district, Assam bad ioh bat noh ia kine ki sawngut ki nong Bangladesh.

Kine ki sawngut kiba la shah kem noh ki dei kiba la tip kyrteng kum u Md Mintu 39, uba dei na ka district Barishal, Bangladesh, u Md Runel 31 bad u Johirul 29, kiba dei na Dhaka District Narayanganj, Bangladesh bad u Md Bilal 37 snem rta uba dei na Kamalpur P.S Kochbar District, Brahmanbaria Bangladesh.

Na kine ki sawngut ki pulit ki la ioh ban kurup noh ia ki kot ki sla ba shu shna thok kynthup ia laitylli ki mobile phone.

Hadien ki pulit ki la register case pyrshah ia ki ha Nongpoh PS ha ki kyndon ain bapher bapher.