Shah kem 4 ngut ki nongkhaii drok ha ryngkat u heroin ha nongbah Shillong

Syllad | The Rising MeghalayaJune 23, 2024

Ki pulit na ka kynhun Anti-Narcotics Task Force (ANTF) ha ka 22 tarik Jylliew ki la ioh ban kem noh ia sawngut ki nongkhaii drok na ki artylli ki jaka ha ka nongbah Shillong bad ioh ruh ban kurup noh ia u drok heroin.

Ki pulit ka ANTF ha ryngkat ki bor pulit napoh Mawlai Police Station ki la ioh ban kem noh ia arngut ki nongkhaii drok na ki bynta jong ka ISBT, Mawiong ia kiba la tip kyrteng kum u Ram Singh 29 bad u Vijay Singh 20 snem rta kiba dei na Them Metor.

Na kine ki pulit ki la ioh ban kurup noh ia 9 tylli ki synduk sabon ba la thep ia u drok heroin uba khia haduh 110.32 gram, artylli ki mobile phone bad kawei ka scooty Aprilla ka bym don nombor.

Ha kawei pat ka jingkhynra ki bor pulit ki la ioh ban kem noh ia arngut ki nongkhaii drok na ka thain Demthring kaba hap hapoh Madanrting police station. Kine ki arngut kiba la shah kem ki dei kiba la tip kyrteng kum ka Evanjrlyne Thongni kaba dei na Lapalang, Lummarboh bad u John Robert Kharmyndai uba dei na Nongmynsong.

Na kine ki pulit ki la ioh ban kurup kawei ka synduk sabon kaba don 11.43-gram u drok kynthup ia artylli ki mobile phone bad ka scooty kaba don ia u nombor (ML05-L-7620).