Shah kem 5 ngut ki nongtuh kali ar shaka na EKH, ioh kurup lai tylli ki thuk thuk

Syllad | The Rising MeghalayaFebruary 25, 2025

Ki pulit ka East Khasi Hills ki la ioh ban kem ia 5 ngut ki nongtuh kali ar shaka bad ioh kurup noh ruh ia artylli ki thuk thuk bad kawei ka scooty.

Haba pyntip ia kane haka 24 tarik Rymphang, u  Superintendent of Police ka East Khasi Hills, u Bah Vivek Syiem u la ong hadien ka jingbuddien ia kawei ka kynhun ki nongtuh kali ar shaka mynta lah kumba katto katne taiew, ki pulit ka Special Cell ka EKH bad ki pulit napoh Sohra PS ki la ioh ban kem noh ia arngut ki nongtuh kali ar shaka ha ka miet 23 tarik na Sohra Rim bad ioh ban kurup noh ia kawei ka thuk thuk Suzuki Gixer bike  (ML 05 AD 4393), kaba shah tuh na Smit bad ia kaba la thmu ban die sha ki briew na Bangladesh.

Kine kiba la shah kem noh ki dei kiba la tip kyrteng kum u Babu Marak (19) uba dei na Dalia Shella bad u N Sangma (30 snem rta) uba dei na Samanda, East Garo Hills.

Kine ki arngut ki nongtuh ki la shimti ia kane ka thuk thuk na Mawkdok na kawei pat ka kynhun nongtuh kaba donkti ban rong tuh ia ki kali ar shaka na ka nongbah Shillong.

U Bah Vivek u la iathuh ruh ba ha ka jingbuddien ki pulit ki la ioh ban kem sa ia lai ngut ki nongtuh kiba donkti ha kaba tuh ia kane ka thuk thuk ba kiba donkti ha kiba buntylli ki kam tuh thuk thuk na ka thain 7 Mer, Upper Shillong.

Kine kiba la shah kem ki dei kiba la tip kyrteng kum u Barabor Namsaw(28) na Jirang, Patharkhmah, u Banroilang Iawrod(19) na Kynbahmalai, Phlangwambroi Mawsynram bad u Declin Warjri(20 snem rta) na Nongmensong Shillong.

U la ong ruh ha ka jingbteng ban pynlong ia ka jingtalasi ha ka thain Sohra, ki pulit ki la ioh ban bat biang ia kawei ka thuk thuk ba shah tuh ha kastep 23 tarik na Mawiong Umjapung kaba don ia u nombor R15 ML05 AA 3297.Kine ki nongtuh ki la pynieng bad iehnoh ia kane ka thuk thuk shwa ban poi ha ka jaka talasi ha Nongsawlai bad phet krad noh na kane ka jaka.

Ia kine ki nongtuh la pynngat ha ki kyndon ain 303 (2) BNS ha Madanrting Police Station.