Shah kem 5 ngut ki nongtuh thuk thuk bad ki nongpyniaid iew sha Bangladesh

Syllad | The Rising MeghalayaApril 2, 2025

Ki pulit ka Tnad Special Cell ka East Khasi Hills ha ka 1 tarik Iaiong ki la ioh ban kem noh haduh san ngut ki nongtuh thuk thuk kynthup ia ki nongpyniaid iew beain ia ki ar shaka shapoh Bangladesh.

U Superintendent of Police ka East Khasi Hills, u Bah Vivek Syiem u la ong ha kaba nyngkong ki pulit ki la ioh ban kem noh markhmat ia ki 3 ngut ki nongtuh thuk thuk na ka thain 101 Area ha ka por mynstep ia kiba la tip kyrteng kum u Timus Warbah 30, u Babar Mawblei 26 bad u Synraplang Makri 23 snem rta kiba dei baroh na Jirang, Ri Bhoi Disrict.

Ki pulit ki la ioh ruh ban kurup noh ia kawei ka kali Alto ba la pyndonkam da kine ki nongtuh ban iaid swait kylleng ka nongbah ban khmih ia ki ar shaka kiba pynieng ha ki rud surok.

Nalor kata ki pulit ki la ioh ruh ban kurup noh ia kawei ka thuk thuk KTM kaba la shah tuh ha ka step 31 tarik Lber na ka thain Malki na kane ka kynhun nongtuh.

U SP u pyntip ruh ba sa arngut kiwei pat ia kiba la tip kyrteng kum u  Meaibor Kharryjja 26 uba dei na Sohlap, Shella bad u  Bakordor Rapmai 24 snem rta na Jatap, Shella kiba la iarap ban shimti ia ki ar shaka kiba tuh sha ki nongthied napoh Bangladesh ruh ki la shah kem noh.

Na ka liang u heh pulit u la ong ba kane ka kynhun runar ka dei kaba donkti ha kiba buntylli ki jingjia shah tuh ar shaka ha ka nongbah Shillong, bad ka jingtohkit ia ki ka dang iaid shakhmat.