Shah kem 5 ngut ki snar tuh bike na ka Lakadong bad Assam

Syllad | The Rising MeghalayaSeptember 18, 2024

San ngut ki suba snar tuh bike uwei uba dang 16 snem ka rta kila shah kem noh ha ki Pulit jong ka Raliang Police Station halor ka jingdonkti ban tuh ia kawei ka bike haka shnong Lakadong, kaba hap haka thain Iooksi, West Jaintia Hills District.

Kane ka jingjia shah tuh bike kala jia haka step 17 tarik Nailur shiteng synia ha ki ar jaka, kata ha Lakadong bad ha 3 Kilo kaba hap ha Umrangso, Dima Hasao District Assam.

Kine ki san ngut ki suba tuh bike kidei ki Steve Syngkon naka shnong Iawthymmei, u Heipormi Synnah bad Nisanki Lamare kiba na Saphai, u Leader Suiam bad uwei uba dang 16 snem ka rta ba na ka shnong Moolibang Shangpung.

U Miklan Paslein u trai jong ka bike Royal Enfield kaba don ia u registration number ML 04 G 7777 ula mudui da ka jingujor ejahar pyrshah ia kine ki san ngut kiba suba donkti ban ring tuh iaka bike jong u na ka shnong Lakadong, kaba shnong kaba don hajan ka Iooksi. Ula iathuh ba kane ka jingjia tuh bike kala jia haka por kumba 2 baje mynstep haka 17 tarik Nailur na ka iing sah jong u.

Ula pynpaw ba haka jingwad ia kane ka bike la lap iaka na ka shnong Shangpung, ia kiba ki nongtuh kila ieh iaka ha shiteng lynti bad haka jingwad iaki suba la ioh bat ia u Leader Suiam ha kaba da ka jingphla jong u, la iohkem sa ia ki paralok jong u kiba suba donkti ha kane ka kam.

Kine ki runar kila pyndonkam da kawei kali Maruti Swift Tourist kaba don ia u registration number ML05 AD 3404 ban leh ia kane ka kam runar.

Shuwa ban rong tuh ia kane ka bike na Lakadong, kine ki runar kila rong tuh ruh ia kawei pat ka bike Royal Enfield kaba don ia u register number AS 31 D 3063 kaba la tuh na 3 Kilo haka por kumba 1:14 Am haka juh ka miet 17 tarik Nailur.

Ki Pulit Assam na 3 Kilo ruh hadien bala ioh jingtip bala iohkem ia kine ki runar kila wan ban shimti iaki na Raliang Police Station ban tohkit halor kane ka jingjia.