Shah kem 7 ngut halor ka jingiap u samla Garo hapoh ka rehab centre ha Assam

Syllad | The Rising MeghalayaJuly 10, 2024

Da kaba pynshong nongrim halor ka jingujor da ka Seng Achik State People’s Front (ASPF) bad ka Garo Jatiya Parishad (GJP) halor ka jingsuba shah pyniap jong uwei u samla Garo hapoh ka rebab centre ha Goalpara, na ka liang ki pulit ka Assam ki la rejister case hapoh ki kyndon bapher bapher bad kem noh ia hynniew ngut ki briew.

Uwei na kiba la shah kem halor kane ka jingjia u dei u nongkhmih jong kane ka rehab u Jintu Chakravorty (24), uba dei na Paikan kaba hap hapoh Krishnai police station ha Goalpara, uba la shah rah noh ha ki pulit na ka bynta ban pynlong shuh shuh ia ka jingtohkit. Kiwei pat kiba la shah kynnoh donkti ki kynthup ia u Prasenjit Nath (23) uba dei na Bapuji Nagar, Goalpara; u Hanif Ali (28), na, Goalpara; u Dhanmaina Banikya (38), na Durga Mandir, Ananda nagar, Goalpara; u Mohsen Khan na Bapuji Nagar, Goalpara bad u Kunal Das (23 snem rta ), uba dei na Boro Bazar, Goalpara.

Nalor kata ki pulit ki la kem noh ruh ia uwei u khynnah rit uba donkti kane ka jingjia ia uba la pynkynriah noh sha ka jaka set jng ki khynnah ha Goalpara.

Kumjuh uwei pat u briew uba la ngat ha ka jingmynsaw bad don mynta hapdeng ka jingshah sumar ha Goalpara Civil Hospital ruh shen un sa shah kem namar ka jingdonkti ha kane ka jingjia, katba arngut kiwei pat ki dang don hapdeng ka jingphet rieh.

Halor kane ka jingjia na ka liang u Myntri Rangbah ka Jylla u Conrad K Sangma u la dawa ia ka jingtuklar lem jong u Myntri Rangbah ka Assam u Himanta Biswa Sarma na ka bynta ban pynlong ka jingtohkit halor ka jingsuba shah pyniap dusmon jong u samla Niksamseng Ch Marak hapoh ka rehabilitation centre ha Goalpara.

Ha ka shithi sha u Sarma, u Sangma u la ong ba une u nongshong shnong ka Jylla u Niksamseng Ch Marak u la shah kem noh ha ki pulit ka Assam ha ka 2 tarik mynta u bnai ha kaba la set ia u hapoh ‘New Life Foundation Centre, Nayapara, Goalpara.’  Hynrei, tang hadien ar sngi la shem ba une u samla u la iap hapoh kane ka centre ha ka rukom kaba suba jur.

Katkum ka jingpyntip da kiba haiing hasem jong une u lanot la ong ba ki bor ba dei khmih jong katei ka centre ki la kam ba ka dei ka jingshim hi ia la ka jingim, hynrei hadien ki la kylla ktien bad kaba la pynartatien halor kane ka jingiap jong u.

“La pyntip sha nga ba ka metiap jong une u lanot ka don ia ki dak mynsaw jur, kata kaba kynthup ia ki dak shah dung tari ba jylliew na shiliang ka durkhmat ka diang jong u, ka jinging ding, ka jingmynsaw na ki bynta jong ka tmoh, syngkai bad ki kjat. Katkum na ki dak ki shin la sakhi ba une u samla u la shah pynshitom bein da kaba shah bom shah tied bad shah dung hapoh kane ka rehab centre,” u la ong.

“Kumta namar kine ki jinglong jingman ba la kdew, Nga kyrpad ia phi ban pynlong mardor ia ka jingtohkit halor kane ka jingjia, kata ia kaba la angnud ruh da kiba haiing hasem jong une u lanot na ka bynta ban ioh ia ka jingbishar hok.