Shah kem 7 ngut ki dkhot ka HITO ba kawang maw ia ki pulit bad magistrate hadien ka jingshah khot hajir u president

Syllad | The Rising MeghalayaSeptember 4, 2023

Kumba hynniew ngut ki dkhot jong ka Seng Hynniewtrep Integrated Territorial Organization (HITO) ki la shah kem noh ha ki pulit namar ka jingdonkti ha kaba kawang maw pyrshah ia ki pulit bad ki magistrate kiba pyrshang ban khanglad ia ki ba kin tur paidbah shapoh Secretariat mynta ka sngi Nyngkong.

Kane ka la wan long hadien ba u president ka HITO u Bah Donbok DKhar u la shah khot hajir ha u investigation officer (IO) hapoh Sadar police station ha kaba iadei bad ka case ba la rejistar pyrshah ia u ha u bnai Naitung ba la dep, kata ka case kaba hap hapoh ki kyndon section 171 bad 34 IPC r/w 105 jong ka MP Act kaba iadei bad ka jingphong ia ki riam (uniform) kiba iong da ki dkhot ka HITO.Kine ki riam ki dei kiba iasyriem bad kiba la pyndonkam da ki pulit SOT. 

Ia u Bah Donbok la synran lang da ki spah ngut ki dkhot ka HITO ha kane ka jingleit tur paidbah mynta ka sngi.

Ki bor pulit ki la hap ban bom lathai bad siat da ki lyer pynsat khmat ne tear gas hadien ba ki dkhot ka HITO ki la sdang ban ther maw sha ki pulit kiba pyrshang ban khang lynti ia ki sha Secretariat.Ha kane ka jingjia u deputy superintendent of police (Dy.SP) ruh u la ngat ha ka jingmynsaw.

Haba kren sha ki lad pathai khubor u SP ka East Khasi Hills district, u Bah Sylvester Nongtnger u la ong ba ha ka jingshisha u IO u la khot ia u president ka HITO ba un wan mih sha Sadar police station mynta ka sngi, hynrei ki la wan da ki kynhun bah. Hooid ngi la shah ia kumba 5-6 ngut ba kin rung shapoh police station katba kiwei ki dang ap shabar.

Hadien ba ngi la shim ia ki jingkren ki jong u kumta ruh une u president ha ryngkat kiwei pat la shah ba kin mih noh napoh police station, ong u SP. Hynrei, hadien ba ki la mih noh, ngi la ioh jingtip ba ki kwah ban wan sha secretariat na ka bynta ban bret ia baroh ki plakas kiba ki la rah ryngkat bad ki, ong u SP.

U la ong ruh ba hadien ba ki la ioh ia kane ka jingtip, ki bor pulit ki la ap noh ha ka lad DC ophis ha ryngkat u magistrate. Ynda la poi ha kane ka jaka, ka jinglong jingman ka la sdang ban khihwin hadien ba kine ki dkhot ki la sdang ban ther maw ia ki pulit bad ki magistrate ban ktahkti ruh ia ki pulit kynthei bad ther maw pyrshah ia u Dy SP kata haduh ba u la ngat ha ka jingmynsaw kaba malu mala.

Kumta ha kaba kum kane ka khep ngi la hap ban pyndonkam bor malu mala da kaba bom lathi.Shuh shuh u SP u la pyntip ba ki la don kumba 6-7 ngut ki dkhot jong ka seng HITO kiba la shah kem noh.

Haba kylli na ka liang u SP u la ong ba ka case ka long namar ba ki phong da ki riam uniform rong iong khlem da ioh ia ka jingbit.Dei na kasne ka daw la rejistar case bad la khot hajir ia utei u president ka HITO.