Shah kem arngut ha ryngkat 139-gram u drok heroin na Shillong

Syllad | The Rising MeghalayaMarch 21, 2024

Ki pulit ka Tnat ANTF na East Khasi Hills hapoh ka jingialam jong u Bah Sandra Nongdhar, MPS haka 20 tarik Lber, ki la ioh ban kem noh ia arngut ki briew ha ryngkat u drok heroin uba don ka jingkhia kaba haduh 139.98-gram na ka thain Happy Valley, Shillong.

U Superintendent of Police ka East Khasi Hills, u Rituraj Ravi u la ong ba ki bor pulit  hadien ka jingpynap shrip ki la ioh ban bat noh ia kawei ka kali Tata Sumo kaba don ia u R/No. ML 05 N 0515 ha kaba ki la pynlong ka jingtalasi bad lapdien ia ki 11 tylli ki synduk sabon ia kiba la buhrieh ia une u drok heroin uba khia 139.98 gram.

U la ong ba kine ki briew kiba la shah kem ki dei kiba la tip kyrteng kum u Joshua Khiangte Tripura (36) bad u Joel Tripura (29 snem rta) kiba dei napoh Damchhara na North Tripura.

Na kine ki arngut la ioh ruh ban kurup ia kawei ka Aadhar card, kawei ka PAN card bad kawei ka mobile.

Hadien kane ka jingioh kurup la rejistar case pyrshah ia kine ki arngut hapoh ki kyndon ka NDPS Act bad ka jingtohkit mynta ka dang iaid shakhmat.