Shah kem arngut halor ka jingjia shah pyniap ha Ichamati bad Mawlai Mawroh

Syllad | The Rising MeghalayaApril 23, 2024

Ki pulit ka East Khasi Hills haka 23 tarik Iaiong, ki la ioh ban kem noh ia arngut ki suba donkti halor ka jingjia shah pyniap ba dang shen ha Ichamati, bad ha Mawlai Mawroh.

Ki tyllong khubor pulit ki iathuh ba ia uwei na kine la ioh ban kem noh na ka thain Mawlai bad ia uwei pat na Nongthymmai.

“Uwei u la shah kem noh halor ka jingdonkti ha ka kam pyniap kaba la jia ha Ichamati bad uwei pat halor ka jingjia shah pyniap ha Mawlai Mawroh,” ong u heh pulit.

Ha ka 2 tarik mynta u bnai arngut ki dkhot ka Khasi Students’ Union (KSU) ki la shah kem noh halor ka jingshah kynnoh donkti ha kaba iadei bad ka jingshah pyniap jong ki arngut ki nongtrei bylla sngi ha Ichamati, East Khasi Hills.

Kine ki arngut kiba la shah kem ki dei kiba la tip kyrteng kum u Shambor Shati 26 snem rta bad u Meshadap Sohpen bad ki dei ruh ki dkhot ka ka Seng KSU South Khasi Hills District.

Lah ban kdew ba ha ka 27 tarik u Lber ba la dep arngut ki briew la kynnoh ba ki la shah bom iap ha ki runar ki bym lah ban ithuh ha Ichamati ia kiba la tip kyrteng kum u Esan Singh bad u Sujit Dutta. Kine baroh arngut ki dei ki nongtrei bylla sngi hapoh kawei ka par mawshun.Ia ki metiap jong ki la lapdien ha Ichamati bad na Dalda.

Katkum ka ejahar ba la ujor da kiba haiing hasem jong kine ki lanot, la ong ba kane ka jingjia ka la wan jia ha ka por ba la pynlong ia ka jingialang pyrshah CAA ha Ichamati.

Katba ha ka 10 tarik mynta u bnai, uwei u nongbylla sngi uba kyrteng u Arjun Ray 52 snem rta u la khlad noh namar ka jingmynsaw hadien ba ma u ha ryngkat arngut kiwei pat ki la shah thombor ha ki runar ha ka thain Mawlai Mawroh, Shillong.

Featured Image by Klaus Hausmann from Pixabay