Shah kem arngut ki nongkhaii drok kynthup ia u khynnah na ka thain Madanrting

Syllad | The Rising MeghalayaDecember 19, 2024

Ki pulit ka East Khasi Hills ha ka 19 tarik Nohprah ki la ioh ban kem noh ia arngut ki nongkhaii drok kaba kynthup ia uwei u khynnah uba dang hapoh rta na ka thain Madanrting.

U Superintendent of Police ka East Khasi Hills, u Bah Sylvester Nongtnger u pyntip ba na kine ki arngut ki pulit ki la ioh ban kurup hynriew tylli ki jingthep sabon ba la buhrieh ia u suba drok heroin uba don ka jingkhia kaba haduh 60.98 gram, kynthup ia artylli ki mobile phone.

Ki pulit ki la rejistar case halor kane ka jingioh kurup bad ka jingtohkit mynta ka dang iaid shakhmat khnang ban lap ia ka tyllong jong une u drok bad ban ithuh bad lah ban  pynduh pyndam ia ki kynhun kiba donkti ha kane ka kam khaii drok beain.

“Kane ka sienjam kaba jop ka dei shibynta jong ka jingpyrshang kaba jur jong ki bor pulit ka District ban iakhun pyrshah ia ka jingjyllei jong ki kam khaii drok beain hapoh ka district bad ban iada ia ka imlang ka sahlang na ka jingshah ktah kiba mih na ka ka jingkyrni ha ki jingdih drok,” ong u heh pulit.