Shah kem arngut kynthup u nongialam ka HNYF halor ka jingbthei bom ha Iew Mawlong
Ki pulit ki la kem noh ia u nongialam jong ka Seng Hynniewtrep National Youth Front (HNYF) bad ia uwei pat halor ka jingsuba donkti ha ka jingpynbthei IED kaba la jia hapoh Them Iew Mawlong, Shillong ha ka miet 9 tarik mynta u bnai.
U Superintendent of Police ka East Khasi Hills, u Rituraj Ravi u la ong haka sngi Nyngkong ki pulit ki la kem noh ia u Bah Tarson Lymba 55 snem rta uba dei u nongialam ka HNYF na ka thain Dawki katba uwei pat uba la tip kyrteng kum u Ebakordor Nongpluh 26 snem rta u la shah kem noh na Shillong ha ka miet sngi U Blei ba la lah. U la ong ruh ba ka jingtohkit bniah halor kane ka dang iaid shakhmat.
![](https://www.syllad.com/wp-content/uploads/2024/09/JIT-Vacancy-823x1024.avif)
Ha kaba iadei bad kane ka jingjia na ka liang ka Seng HNYF ka la kyntait ia ka jingdonkti jong u Bah Lymba uba dei u disciplinary secretary jong ka Seng halor katei ka jingjia pynbthei bom ha Iew Mawlong.
U Tarson u dei uba la iarap ha ka ban wanlam ia ki nongialam ka HNLC na ki katto katne ki jaka ha ki thain khappud jong ka ri sha ka nongbah Shillong na ka bynta ka jingiakren iasuk bad ka sorkar.
Na ka liang ki dkhot jong ka Seng HNYF ba la ialam da u president jong ka u Bah Sadon K Blah ha ryngkat kiba haiing hasem jong u Tarson ki la leit ban iakynduh ia u SP ka EKH ban pan jingpynshai halor kane ka jingshah kem ka jong u.
“Na ka liang u SP u la pynpaw shai ba ka jingshah kem jong u Bah Tarson ka dei halor ka jingjia pynbthei bom ba dang shen ha iew Mawlong,” ong u Blah sha ki lad pathai khubor hadien ka jingiakynduh.
Hynrei, ka Seng ka la ong ba kam ngeit satia ba u Bah Tarson un donkti ha katei ka jingjia, u la ong da kaba bynrap ruh ba u Thyrson u la don hapoh ka seng HNYF mynta lah 26-27 snem bad um ju donkti satia ha kino kino ki kam bymman.
Haba kylli, une u president ka HNYF u la ong ruh, “Ngi la shim ia ka rai ban ym pynthut ia ka jingtohkit jong ki pulit. Ngin iai ap tad haduh ban da dep ka jingtohkit. “Hynrei, lada ki pulit ki kin charge sheet bad leit sha ka kashari, ngin ym shong klikti nasmar na ka liang ki pulit ki ju pynkylla langknia ia ki nongialam sengbhalang haba jia kiba kum kine ki jingjia,” u la ong shuh shuh.
U la ong ruh ba kane kam dei satia ka sien kaba nyngkong ba ki nongialam sengbhalang kin shah rah bad shah tohkit ha ki bor pulit, kata da kaba bynrap ruh ba wat kas kali jong u ruh ka la shah talasi ha ki bor pulit ka Ri Bhoi khlem kano kano ka daw.
Nalor kata u president ka HNYF u la ong ruh ba u Bah Tarson ha ki snem kiba la dep u la iarap ia ka tnat pulit na ka bynta ban wanlam ia ki nongialam ka HNLC sha ka miej jong ka jingiakren.
Ha kajuh ka por u la ong ruh ha kaba iadei bad ka Them Metor, kane ka dei ka mat kaba la pynlong ia ki samla ba kin pynpaw ka jingbitar ia ka sorkar namar ka jingbym lah ban pynkynriah ia kine ki briew (Harijan) na kane kane ka jaka ha Them Iew Mawlong.
Shuh shuh u la ong ruh ba ka la don ka jingbitar namar ias ka surok la khang noh da ka sorkar naduh kine ki khyndiat snem na ka bynta ban aijingiada ia ki Harijan khlem da pyrkhat ha kaba iadei bad ka jingpynsuk ia ka leit ka wan jong ki paidbah.
Kumta ka Seng ka kyntu ia ka Tnat pulit bad sorkar ba ki dei ban pynlong ia ka jingohkit kaba bniah hashwa ban shu pynkylla langknia, namar mynta ka long ban long na ka HNYF, lashai ka lah ban long na ka KSU, FKJGP abd kiwei kiwei.
Ha kawei pat ka bynta, na ka liang u Mama jong u Bah Tarson u Bah Bnai Syngkrem ruh u la ong ba u Tarson u la shah phone bad phah wan shapoh Dawki police station. Hadien kane ki pulit ki la ong ba kin ialam ia u sha Shillong na ka bynta ban pynlong ka jingtohkit, ong u Bah Blah. Watla katta u la ong ba um thikna la u don ne em hapoh shnong ha ka por ba katei ka jingjia ka la jia.
Leave a Reply