Shah kem ka kynhun runar ba ju lute ia ki kali ha ka surok bah NH-06 ha Ri Bhoi 

Syllad | The Rising MeghalayaSeptember 11, 2024

Ki bor pulit ka Ri Bhoi kiba la trei khlem shongthait ban thwet ia kawei ka kynhun runar kaba ju donkti ha ki kam dawa pisa na ki kali kit mar khamtam ki kali kit dohkha, syiar bad kiwei kiwei haka shiteng synia 11 tarik Nailur  ki la ioh syndon ban kem ia 4 ngut ki briew ba la kynnoh donkti ha kine ki kam lute na ka surok bah National Highway 06 hapoh ka district.

Kine ki saw ngut kiba la shah kem ki dei kiba la tip kyrteng kum u Ricky Tangsang (26 snem) ba sah ha Sajer, Nongpoh, u Mustafa Lyngdoh (32 snem) na Umlyngkdait, u Shem Warjri (27 snem) na Umsning Proper A bad u Kyrshanbor Marwein (22 snem) na Mawroh, Nongpoh.

Ka khubor ka iathuh ba mynta la kumba ar ne lai bnai ki pulit ka Ri Bhoi District ki la ioh pdiang ia ki jingujor na ki nongniah kali kit mar ba ki ju shah lute naduh ka pisa, ki mobile bad kiwei kiwei, bad ki ju shah shoh shah bom ruh ha ki kynhun nonglute bym lah ban ithuh kiba ju pynap ia ki kali ha ki surok kiba kham kynjah bad khongdong jong u surok bah NH 06 khamtam ha ki por mynmiet.

Hadien kine ki jingujor ki pulit ka district ki la shimkhia ban pynlong ia ka jingtohkit ban thwet ia kane ka kynhun ki nonglute da kaba pynlong ia ka jingiaid pahara ha ki surok highway.

Hynrei haka 11 Nailur haka por 1:16 baje mynstep ki pulit ki la ioh jingtip halor kawei ka jingjia shah lute jong kawei ka kali pickup kaba kit dohkha, ha kaba la don kumba ar tylli ki kali kiba la pynsangeh ia kane ka pickup kiba la shoh pynmynsaw ia u nongniah bad u nongbud hashwa ba kin lute ia ka pisa bad knieh ia ki mobile phone bad krad na katei ka jaka.

Mar ia ioh jingtip ki pulit lyngba ka Special Team kila her bran bran sha katei ka jaka ban pynlong ka jingtohkit bad dei hadien katto katne por la ioh jingtip halor kawei ka kali maruti Alto kaba la pynieng ha Pahamsyiem ha kaba ki pulit ki leit ban bat ia katei ka kali bad ban kem ia uwei na kiba donkti ha kane ka kam lute katba u wei pat u la lait phet na katei ka jaka hynrei hadien shiteng kynta jong ka jingbeh thong ki pulit ki la ioh ban kem noh ia u.

Da ka jingtohkit la ioh jingtip ba ki don kumba 4 ngut kiba donkti ha ki kam lute ia ki kali kit mar  ha ki por mynmiet ha u surok bah NH 06 bad ki pulit ki la ioh kem noh ia kine ki arngut ruh kumjuh.

Ki pulit ki la ioh ruh ban kurup noh ia ki ar tylli ki kali kaba kynthup ia kawei ka maruti Alto kaba don ia u number AS 01 FN 4202 bad kawei ka Maruti suzuki baleno ka bym pat don number satia.

Na ka liang ki pulit ka Ri Bhoi ki la pyngnat ia kine ki 4 ngut ha ki kyndon aiñ kam tuh kam lute bad shoh pynmynsaw bad kiwei kiwei.