Shah kem lai ngut ki nong Nigeria ba prong tuh na Bangladesh sha India

Syllad | The Rising MeghalayaSeptember 8, 2020

Lai ngut ki nong Nigeria ba kynthup arngut ki kynthei bad uwei u shynrang ki la shah kem haki pulit jong ka West Jaintia Hills District hadien ba kila prong tuh shapoh u pud u sam ka ri haka sngi Nyngkong.

Ka khubor kaba iohlum ba kane ka jingiohkem ki Pulit ruh kadei kaba shu jia ryngkhat haka por ba ki iaid lynti haka por 1 baje mynstep sha katei ka thain. Ki pulit la bat iaka kali Maruti Alto kaba don u number ML-05Q-3104 ha Thlumuvi, ka jaka kaba hap ha Amlarem Sub-Division bad kila lap pynban da kine ki nong Nigeria.

Kine kiba shah kem ki dei u Okoye Christian Nonso (20 snem) ba na Oroma-Etti-Anamera, Nigeria, ka Nwacimiere (29 snem) na Ogutatuo, Nigeria bad ka Agukwendu Stephanie Uchechi (25 snem) na Negbidi Emo, Nigeria.

Kiwei pat ki trai jylla kiba iarap ban pynryngkang par na Bangladesh sha India ki kynthup ia Devinson Marngar (22 snem) ba na Pynthorbah, Shillong uba dei u nongniah kali Maruti Alto.

Ki Pulit ki suba jur ba kine ki briew ki wan na Bangladesh bad thmu ban leit sha sor Shillong lyngba ka sor Jowai.

Ki Pulit jong ka Amlarem hadien bala tohkit ia kine ki nong Nigeria bad u nongniah kali Alto kila lap pynban ba ki dang don sa lai ngut kiwei pat kiba ki trai jylla ba iarap pynprong tuh ia kine ki nong Nigeria shapoh ka ri. Kila kem ia kine lai ngut bad 2 ngut ki dei na ka shnong Umladkhur, West Jaintia Hills.

Assistant Inspector General of Police (A), Bah GK Iangrai ula ong ba kine ki nong Nigeria kim don ki kot ki sla kiba biang.

Halor kane ka jingiohkem ia kine ki nong Nigeria bad ki trai shnong ba iarap ba pynrung iaki sha u pud u sam ka Ri India ka jingtohkit kala iaid shakhmat.