Shah kem laingut ki nongkhaii ksiar beain na Shillong, ioh kurup ia ka ksiar ba shongdor T. 1 klur

Syllad | The Rising MeghalayaSeptember 24, 2023

Hadien ba la ioh ia ka jingtip kaba bniah halor ka jingdon ki nongkhaii ksiar beain lyngba ki jaka khappud ka India Bangladesh kiba hap hapoh Meghalaya, na ka liang ki ophisar ka Commissioners of Customs Preventive (CCP) Shillong ki la ioh ban bat ioh ia kawei ka kali XUV 500 hynnin ka step sngi Saitjain na ki thain Jhalupura, Shillong ha kaba ki la ioh ban kurup noh ia ki ksiar bar ri kiba shongdor haduh T.1 klur.

Kane ka jingioh kurup ka la wan long ruh hadien ba la ioh jingtip ba kine ki nongkhaii ki thmu ban pynpoi ia kine ki ksiar shapoh Guwahati. Ha kane ka kali la don tang uwei u briew uba dei napoh Rangia, Assam bad uba dei tynrai napoh West Bengal.

Hadien ka jingtohkit u la phla ba kine ki ksiar ba thmu ban khaii beain ki don bad u. Kumta hadien la kurup noh ia 14 tylli ki biskit ksiar ia kiba la song ha ki artylli ki platik kiba don ka jingkhia kaba1632.450 gram bad kiba shongdor haduh kumba T. 1,01,78,326, ong ka CCP.

La ong ruh hadien ba la ioh jingtip ia uwei pat u briew uba la aiti ha u ia ki 7 tylli kine ki biskit ksiar, kumta mardor ki ophisar ka CCP ki la pynlong ka jingbuddien bad ioh ban kem noh ia une u briew na ka thain Jhalupara. Nalor kata une u briew ruh ula phla ba u la ioh ia kine ki ksiar na kawei ka longkmie kaba shong iew ha ka thain Iewduh, Shillong.

Kumta ka kynhun ka la pynlong ka jingleit khynra ia katei ka dukan bad ioh ban kurup ia ka pisa T.9.5 lak na kaba die ia katto katne bynta na kine ki ksiar ia kiba la ioh ban kurup noh.

Hadien ka jingtohkit, kane ka briew ka la phla ba ia kine ki ksiar la pynpoi na ki bynta khappud ka India Bangladesh. Kumta ia baroh kine ki laingut ki briew la kem noh bad ka jingtohkit shuh shuh ka ka iaid shakhmat, ong katei ka tnat.

Lah ban kdew ba ha kawei pat ka jingjia ha kine ki shi bnai ba la dep, ki ophisar ka CCP Shillong ki la ioh ban kurup 5 tylli ki biskit ksiar kiba khia 582.70 gram na uwei u briew uba dang wan da ka Maruti 800 ia kaba la ioh bat noh ha Jorabat.

Ia kine ki ksiar la khaii beain na Khappud India Bangladesh na ka thain Bholaganj. Ha ka jingbuddien kaba mardor ka kynhun ka la pynlong ka jingkhynra ia ka iingsah jong u ha Lumparing ha kaba ki la ioh ban kurup ia ka ksiar nalor ka pisa India kaba long haduh T.3.96 klur, kata ia kaba la ngeit ba ka dei ka pisa ba la ioh lyngba kane ka kam khaii ksiar beain.