Shah kem sa 12 ngut kynthup u Pulit ba shongthait ba shah kynnoh shongkha awria
JOWAI: Sa 12 ngut ki briew kynthup ïa u Pulit Ophisar uba la shongthait kila shah kem haka kynhun pulit Special Investigation Team (SIT) jong ka West Jaiñtia Hills District kaba tohkit bniah ïaka jingshah pyngngop bad shah khaii ki kynthei khynnah haka kam awria ha Rilum Jaiñtia.
U Superintendent of Police West Jaiñtia Hills District, Bah Lakador Syiem ula ïathuh haka jingïalang Crime Conference jong ka tnad Pulit West Jaiñtia Hills District ha Conference hall jong ka SP Office, Jowai. La ïadonlang u Dy. SP Headquarter U Bah MJ Marngar MPS uba khlieh ïaka SIT bad ki dkhot ka SIT, u Additional SP BJ Chetri, Dy SP Shahana Mukherjee bad kiwei kiwei.
![](https://www.syllad.com/wp-content/uploads/2024/09/JIT-Vacancy-823x1024.avif)
U Bah MJ Marngar ula ïathuh ba haduh kila tohkit haduh 40 ngut eiei ha kine ki shibnai lynter. Kila kem haduh 24 ngut ki briew ba kynthup ïaki kynthei bad bad rangbah. “Kane ka case kan shimpor ban tohkit bad ka lah ruh ban shimpor da ki snem, hynrei ngin pyrshang katba lah ban pyndep ïaka case”, la ong u bah MJ Marngar.
“Baroh kine ki 12 ngut la ïoh kem dangshen ki kynthup ïa uwei u ophisar pulit ba shongthait bad 4 ngut ki shakri sorkar. Kine ki 12 ngut kiba shah kem la pyngngat haka kyndon aiñ lehbeijot ïaki khynnah hapoh ka POCSO”, la ong u SP Bah Lakador Syiem.
U Bah Syiem ula ong ka jingtohkit halor kane ka kam ka dang iaid shakhmat bad ngim pat lah ban iathuh kyrteng ïa kiba shah kynnoh bad ka don ruh ka jingsuba jur ba ka don ka jingkhaii ïa ki kynthie khynnah wat sha Assam. Ula ong ruh ba ki Pulit na kiwei ki district kumjuh na kiwei ki jylla ki ai ka jingiatreilang bad ki dang thwet ïa kiwei ki suba donkti ha kane ka kam shongkha awria bad khaii kynthei.
Leave a Reply