Shah kem sa uwei u nongialam ka kynhun kieng atiar bathymmai ka NLCN na Iewduh

Syllad | The Rising MeghalayaAugust 17, 2023

Sa uwei pat u nongialam jong ka kynhun kieng atiar kaba dang shu seng thymmai ka National Liberation Council of Nongkyndong (NLCN) u la shah kem noh ha ki pulit na ki thain Iewduh, Shillong mynta ka step sngi Palei.

Na ka liang u heh pulit u la ong ba ia une u nongialam ka NLCN la ithuh kum u  self-styled Area Commander jong ka East Khasi Hills District. Mynta ka jingdon jong baroh ki nongialam bad ki dkhot kiba la shah kem jong kane ka kynhun ka la kot sha ka 11 ngut, kata kynthup ia uwei uba dang khynnah ka rta.

U heh pulit lyngba une u kyrwoh u pyntip ba ka jingkhynra ban ioh kem ia kiwei pat ki dkhot jong kane ka kynhun kieng atiar ka dang iai bteng.

Ia kine ki dkhot baroh kiba la shah kem la wanlam hakhmat ha kashari mynta ka sngi bad na ka liang ki pulit ki la pan por kylluid na ka bynta ban set bad ban pynlong ia ka jingtohkit khnang ban ioh kem ia baroh ki dkhot jong kane ka kynhun.

Kane ka jingshah kem jong une u nongialam ka la wan long ruh tang shi sngi hadien ba ki pulit ki la ioh ban kem noh ia hynniew ngut ki nongialam bad ki dkhot  jong kane ka kynhun tang napoh EKHD kaba kynthup ia uwei u khynnah uba dang hapoh ka rta.

Nalor kata la ong ruh ba kane ka kynhun kieng atiar ba la seng thymmai ka don ka jingiadei bad ka kynhun kieng atiar na Nagaland ka NSCN ha kaba ka la pynkhreh ruh ban phah ia ki dkhot ba nyngkong jong ka na ka bynta ban leit shah hikai pyntbit ha ki kam ialeh pyrshah sha Nagaland mynta ka sngi 17 tarik.

Hynrei hadien ka jingioh jingtip na ka bynta ki pulit ki la pynlong ka jingkhynra mynta ka step sngi Balang bad ban kem noh ia hynniew ngut na ki bynta bapher bapher jong ka EKHD bad pynngat ia ki hapoh ki kyndon jong ka IPC bad Unlawful Activities (Prevention) Act.