Shah kem sa uwei u suba donkti ban pyniap ia u Pynkhreh Surong, ioh biang iaka kali

Syllad | The Rising MeghalayaMarch 28, 2023

Ki Pulit jong ka West Jaintia Hills District kila iohkem sa ia uwei u suba donkti ban pyniap ia Pynkhreh Surong haka sngi ba Ar.

Une uba shah kem u dei u Jimmy Kyndait uba na Moorap. Da kane ka jingioh kem ia u Jimmy Kyndait kiba shah kem halor kane ka jingjia pyniap briew mynta ki don lai ngut. Kine ki kynthup ia u para u I Love You, u Meban Talang na Moorap bad u Sambun Dkhar na Mynsngat.

Ka khubor ka iathuh ba ki pulit kila kem ia u Jimmy na ka shnong jong u na Moorap haka por shiteng sngi.

Shuh shuh kawei pat ka khubor kaba iohlum ka iathuh ba ki pulit kila ioh kurup biang iaka kali Mahindra pick up jong u Pynkhreh na Tyrsad, East Khasi Hills District.

Ka jingtohkit ki pulit halor kane ka jingjia kala iaid shakhmat ban wad bniah ioh don sa kiwei kiwei kiba sylla ha kane ka kam pyniap namar ka jingjia ka iasyriem bad ka kam runar ruser u I Love You. Ka jingthmu ka long haka juh ka rukom bad ka rukom pyniap briew u I Love You bad kata ka dei ban ioh die iaka kali hadien ba pyniap bar rahbor iaki briew.

Kumban shu pynkynmaw ba une u Pynkhreh Surong uba na ka shnong Mynsngat ula shah rahbor bad shah pyniap dusmon naduh ka 9 tarik Lber 2023.

Dei hadien ar taiew, u Pynkhreh Surong ula jah rngai ryngkat bad ka kali Mahindra Pick Up, haka step 22 tarik Lber kiba ha iing jong u kila kila ioh jingtip ba u Pynkhreh um wan phai shuh shala iing namar ba ula shah pyniap dusmon.

Halor kane ka jingjah rngai u Pynkhreh ki pulit kila ioh iaka FIR ha ka 21 tarik Lber ha Nartiang Police Station ba u Pynkhreh Surong uba na Mynsngat, ula jah nala iing naduh 9 tarik Lber ryngkat bad ka kali Mahindra pick up kaba dang thymmai.

Mar mar ki pulit kila pynlong iaka jingtohkit bad kila kem ia u Meban bad u Sambuun. Haba tohkit bniah ki Pulit, u para jong u I Love You ula phla bad ula ialam iaki pulit sha ka jaka ba ki bret iaka metiap u Pynkhreh Surong haka shnong Pommura kham pajih na ka surok bah haka jaka khlaw, kaba hap ha Mawryngkneng Police Station.